بۇل ماسەلەنىڭ ءالقيسساسى، بيۋدجەت تاپشىلىعى عوي. باقانداي 3 ترلن تەڭگە جوق. سونىڭ ورنىن تولتىرۋ كەرەك بولىپ، جوعارىداعىلار جان-جاعىن قارمانىپ ابدەن تىپىرلاپ جاتىر. ۇلتتىق قوردان قانشا الىنعانى، بۇل رەتتە كىمنىڭ نە دەپ "جىرلاعانىنا" توقتالماي-اق قويالىق. دەگەنمەن دەمالىس كۇندەرىنە قارسى ەلەڭ-الاڭ ۋاقىتتا ەڭبەك ءمينيسترى جۇمىس ىستەپ جۇرگەن زەينەتكەرلەردىڭ اقشاسىنا دا كوزدەرى ءتۇسىپ وتىرعاندارىن ءبىلدىرىپ، "بىردەمە" دەپ قالدى. سول-اق ەكەن قاراشانىڭ نارازىلىعى بۇرق ەتتى، دەپ جازادى Dalanews.kz.
ال وسى كەزدە جەمقورلاردىڭ ىشكەن-جەگەنىن كورمەي، تام-تۇمداپ سوڭعى ينستانسياسىنا ارەڭ جەتەتىن "سۋبسيديا دەگەن قىپ-قىزىل شىعىن" دەگەندى بىرەۋ دالەلدەپ شىعا كەلدى. "جوق" دەگەندى كەسىپ ايتامىن دەپ قارجى ءمينيسترىنىڭ دە اۋزى كۇيدى. "مەملەكەتتىك قىزمەتكەرلەر ەندى سىياقى المايدى" دەگەن ول ءبىراز ۋاقىتقا دەيىن اقتالۋعا ءماجبۇر بولدى. كوبىسى بۇل "قاي ساسقاندارى" دەپ شۋلاسىپ، ءوز قۇلاقتارىنا وزدەرى سەنبەگەندەي بولعانىمەن، كورىپ وتىرعانىمىزداي، بۇگىندەرى ۇكىمەتتىڭ وسىنداي ءبىر ساندىراقتارى اقىرىنداپ شىنعا اينالىپ كەلەدى.
ەسكى قازاقستاننىڭ ورنىن جاڭاسى باسىپ، اگرو سالاعا بولىنەتىن قىرۋار قاراجاتتان (جەمقورلاردىڭ جەمساۋى)، ارەڭ دەگەندە كۇنى كەشە عانا "ءدامىن تاتىپ" كورە باستاعان فەرمەرلەر قاۋىمى 2025 جىلى سۋبسيديادان مۇلدە قاعىلماق. بۇل تۋرالى بۇگىن، 18 قاراشادا ماجىلىستە اگرارلىق ماسەلەلەر جونىندەگى كوميتەتتىڭ كەڭەيتىلىگەن وتىرىسىندا ءمالىم بولدى. دەپۋتاتتاردىڭ ساۋالىنا جاۋاپ بەرگەن ۆيسە-پرەمەر سەرىك جۇمانعارين كەلەسى جىلى اۋىل شارۋاشىلىعى وندىرۋشىلەرىنە قارجىلاي سۋبسيديا ءبولۋ كىلت تىيىلاتىنىن ايتتى.
"شىنىن ايتۋ كەرەك، كەلەسى جىلى قارجىلاي سۋبسيديا بولمەيمىز. كوكتەمدەگى ەگىستىك ناۋقانى كەزىندە 5% سىياقى مولشەرلەمەسىمەن نەسيە بەرەمىز، بولدى، ءبىتتى. سۋبسيديا دەگەن جالپىلاما سيپاتتاعى ترانسفەرتتەر ارقىلى اكىمدىكتىڭ قۇزىرەتىنە وتەدى. قولدانىستاعى بۇل جۇيەدە ۇنەمى كەزەك بولىپ جاتادى، قارىزدار كوبەيىپ كەتەدى، مىنە وسىنى دوعارۋ كەرەك. سوندا قالاي؟ سۋبسيديا دەگەندى الىپ تاستايمىز، ويتكەنى قارجىلاندىرۋ جوق"، - دەدى سەرىك جۇمانعارين.
ونىڭ ايتۋىنشا، بيىل بيۋدجەتتەن سۋبسيديالاۋعا 1 ملرد دوللار بولىنگەن.
ال "وتباسى بانك" سالىمشىلارىنىڭ جىلدا ءبىر رەت الاتىن مەملەكەتتىك سىياقىسىن قيۋ، وندا دا پاتەر ساتىپ العاندارعا قاتىستىسى، ازىرگە ۇسىنىس كۇيىندە. بۇل تۋرالى مەملەكەتتىك بانك باسقارماسى ءتورايىمى ءلاززات يبراگيموۆا "ۋادە" باعدارلاماسىنا بەرگەن سۇقباتىندا ايتىپ قالدى.
"جارتى جىل بولدى، مۇنى ايتىپ كەلە جاتقانىمىزعا... ونەركاسىپ جانە قۇرىلىس مينيسترلىگى جانىندا جۇمىس ىستەپ جاتقان بەيرەسمي كوميسسيا بار. سونداي-اق بۇل ۇسىنىستى ۇلتتىق ەكونوميكا، قارجى مينيسترلىكتەرىمەن دە تالقىلاۋدامىز. ءبىز مەملەكەتتىك سىياقىنى زاەم الىپ ۇلگەرگەن سالىمشىلارعا تولەۋدى تىيۋ تۋرالى ۇسىنىس جاسادىق. "ناۋرىز"، "باقىتتى وتباسى" جانە تاعى باسقاسى بويىنشا دەگەندەي. ويتكەنى مەملەكەت بۇل ادامدار الدىنداعى باسپانامەن قامتاماسىز ەتۋ ماقساتىن ورىندادى عوي. ال بۇل ۇسىنىس قابىلدانسا، وندا جىل سايىن 20 ملرد تەڭگە بيۋدجەت اقشاسىن ۇنەمدەۋگە مۇمكىندىك الامىز"، - دەيدى يبراگيموۆا.
ايتا كەتەلىك، بۇل بيىلعى بيۋدجەت تاپشىلىعىنا قاتىستى "مارافون". ال كەلەسى جىلى وسىنداي ۇنەمدەۋ شارالارى ودان سايىن كۇشەيە تۇسەرى ايدان انىق. ويتكەنى الداعى جىلدىڭ بيۋدجەتىندە مۇناي باعاسى 70-75 دوللار شاماسىندا بەلگىلەنىپ، اسىرا باعالانعان بولۋى مۇمكىن. ويتكەنى دونالد ترامپ بيلىككە كەلسە، مۇنايدىڭ ءبىر باررەلىنىڭ قۇنىن 40 دوللارعا "قۇلاتامىن" دەگەن امبيسيالىق ماقساتى بار. بۇل وسى شيكىزات باعاسى جاقىن بولاشاقتا ارزانداماسا، ەندى قىمباتتامايتىنىن بايقاتسا كەرەك. ونىڭ ۇستىنە ساراپشىلار دابىل قاعىپ، ايتىپ جۇرگەن ەكونوميكاداعى ءۇش داعدارىس تا 2025-2026 جىلدارعا ساي كەلىپ تۇر ەمەس پە؟..
