فاريزاعا
فاريزاجان, فاريزا-قىز,
ٶمٸردە اقىنداردىڭ بەرٸ جالعىز.
شىداي-شىداي اقىرى جالىعارمىز,
بٸرٸمٸزدەن بٸرٸمٸز ارىلارمىز.
بٸزدەردٸ دە جوقتايتىن جان بولسا ەگەر,
شاڭ باسقان ارحيۆتەردەن تابىلارمىز.
سەن مەنٸ بٸلەسٸڭ بە, بٸلەسٸڭ بە?
جارالماعان جان ەكەم كٷرەسۋگە.
جىلاي جٷرٸپ, ٶتٸرٸك كٷلەسٸڭ دە,
جٷرەسٸڭ دە قوياسىڭ, جٷرەسٸڭ دە.
بٸرٸ يتەرٸپ كەۋدەمنەن, بٸرٸ شالىپ,
تاستاعىسى كەلەدٸ كٷرەسٸنگە.
فاريزاجان, سەن سونى بٸلەسٸڭ بە?...
جانارىمدى تۇمانمەن تۇمشالادىم,
...سەرٸپپەسٸ ٷزٸلٸپ تۇر ساداعىم.
جٸگٸتٸنەن قازاقتىڭ دوس تابا الماي,
قىز دا بولساڭ مەن ساعان مۇڭ شاعامىن.
اۋىرلار دەپ ويلاپ پا ەم مۇنشا حالٸم...
اقىن بولىپ نەسٸنە جاراتىلدىم,
اراسىندا قاپ قويماي قارا تٷننٸڭ.
قاسيەتٸن سەزەم دەپ انا تٸلدٸڭ,
قاۋىرسىنى قالمادى قاناتىمنىڭ.
قۋ تٸرلٸككە قۇل بولىپ, اياڭ باسىپ,
قۇلاشىمدى جايا الماي باراتىرمىن.
مومىن ەدٸم, جاقسى ەدٸم, ۇياڭ ەدٸم,
اتتاپ ٶتتٸم ولاردىڭ قييا بەلٸن.
ەندٸ, مٸنە, قاۋقارسىز قۇر اشۋدى,
جييا بەرگٸم كەلەدٸ, جييا بەرگٸم.
ماڭدايىمنان سيپاعان بٸر جان بولسا,
ەندٸ قالعان ٶمٸرٸمدٸ قييار ەدٸم.
بٸلمەيمٸن, بۇزىقپىن با, جىندىمىن با?!
كەپ تۇرادى تٸلەگٸم مۇڭدى-مۇڭعا.
ەندٸ قالعان ٶمٸردٸڭ قۇردىمىندا,
ٶلتٸرسە دە كٶمبەيمٸن جىردى قۇمعا!
نٶل بولادى دەپ ايتام, جالتارمايمىن,
كٶبەيتسەڭ دە قانشاما مىندى-مىڭعا...
اينالاعا قارايىق انىق بارلاپ,
(تٷن كەتكەسٸن, كٷن شىعىپ, جارىق بولماق),
He تۋرالى جىرلاساق, فاريزا-قىز,
باعىشتايىق بەرٸن دە حالىققا ارناپ.
فاريزا, فاريزاجان, فاريزا-قىز,
بٸرٸمٸزدەن بٸرٸمٸز ارىلارمىز.
توم-توم بولىپ دٷكەندە تۇرماساق تا,
پودۆالداعى ارحيۆتەن تابىلارمىز...
مۇقاعالي ماقاتاەۆ
