Farizaǵa
Farizajan, Fariza-qyz,
Ómirde aqyndardyń bári jalǵyz.
Shydai-shydai aqyry jalyǵarmyz,
Birimizden birimiz arylarmyz.
Bizderdi de joqtaityn jan bolsa eger,
Shań basqan arhivterden tabylarmyz.
Sen meni bilesiń be, bilesiń be?
Jaralmaǵan jan ekem kúresýge.
Jylai júrip, ótirik kúlesiń de,
Júresiń de qoiasyń, júresiń de.
Biri iterip keýdemnen, biri shalyp,
Tastaǵysy keledi kúresinge.
Farizajan, sen sony bilesiń be?...
Janarymdy tumanmen tumshaladym,
...Serippesi úzilip tur sadaǵym.
Jigitinen qazaqtyń dos taba almai,
Qyz da bolsań men saǵan muń shaǵamyn.
Aýyrlar dep oilap pa em munsha halim...
Aqyn bolyp nesine jaratyldym,
Arasynda qap qoimai qara túnniń.
Qasietin sezem dep Ana tildiń,
Qaýyrsyny qalmady qanatymnyń.
Qý tirlikke qul bolyp, aiań basyp,
Qulashymdy jaia almai baratyrmyn.
Momyn edim, jaqsy edim, uiań edim,
Attap óttim olardyń qiia belin.
Endi, mine, qaýqarsyz qur ashýdy,
Jiia bergim keledi, jiia bergim.
Mańdaiymnan sipaǵan bir jan bolsa,
Endi qalǵan ómirimdi qiiar edim.
Bilmeimin, buzyqpyn ba, jyndymyn ba?!
Kep turady tilegim muńdy-muńǵa.
Endi qalǵan ómirdiń qurdymynda,
Óltirse de kómbeimin jyrdy qumǵa!
Nól bolady dep aitam, jaltarmaimyn,
Kóbeitseń de qanshama myndy-myńǵa...
Ainalaǵa qaraiyq anyq barlap,
(Tún ketkesin, kún shyǵyp, jaryq bolmaq),
He týraly jyrlasaq, Fariza-qyz,
Baǵyshtaiyq bárin de halyqqa arnap.
Fariza, Farizajan, Fariza-qyz,
Birimizden birimiz arylarmyz.
Tom-tom bolyp dúkende turmasaq ta,
Podvaldaǵy arhivten tabylarmyz...
Muqaǵali Maqataev
