سۋديا تاتيانا چەرنىش تەلەارنا وكىلىنىڭ ءوتىنىشىن جارتىلاي قاناعاتتاندىردى. سوت زالىندا جۋرناليستەرگە ءتۇسىرىلىم جاساۋعا رۇقسات بەرىلگەنمەن، تەلەارنا وكىلىنىڭ بەينەسىن تۇسىرۋگە شەكتەۋ قويىلدى. سونداي-اق، سۋديا ازىرلەنەتىن ماتەريالداردا جۋرناليستەرگە وتىرىسقا باعا بەرەتىن كومەنتارييلەردەن اۋلاق بولۋدى، تەك قۇرعاق فاكتىلەرگە سۇيەنۋدى مىندەتتەدى.
تەلەارنا وكىلى سوت وتىرىسى بارىسىندا جاسالعان ءتۇسىرىلىم ءىستى قاراۋعا كەدەرگى كەلتىرىپ، ءتىپتى، جاۋاپكەر تاراپقا ءقاۋىپ ءتوندىرۋى مۇمكىن ەكەن.
«ءبىز كەز-كەلگەن فوتو، ۆيدەو ءتۇسىرىلىم، تەديو جانە تەلەترانسلياسيا اتالعان ءىستىڭ ءمان جايىن انىقتاۋعا كەدەرگى كەلتىرىپ، جاۋاپتى تاراپتىڭ وكىلدەرىنە ءقاۋىپ ءتوندىرۋى مۇمكىن. تالاپكەر جاققا ونداي قاتەر تونەدى دەپ ويلامايمىز»، - دەگەن ارنا وكىلى الدىڭعى سوت وتىرىسىنان كەيىنگى كەي اقپارات قۇرالدارىنىڭ، اتاپ ايتقاندا ازاتتىق راديوسىنىڭ جۇمىسىنا سىن ايتقان.
«2016 جىلعى 30 مامىرداعى وتىرىستىڭ ازاتتىق تىلشىلەرى ازىرلەگەن ۆيدەوجازباسى جانە ينتەرنەت جەلىسىندە وسى باق-تىڭ سايتىندا جۇرتقا جەتكىزىلگەن مالىمەتتەر اۋديوتريانىڭ شاعىمدانۋشىعا، ونىڭ قىزمەتكەرلەرى مەن وكىلدەرىنە قولداۋىن تۋعىزاتىن پىكىرلەرمەن سۇيەمەلدەنگەن»، - دەيدى تەلەارنا وكىلى.
سوتتا سويلەگەن ارنا وكىلى اقپارات قۇرالدارى ارقىلى اگرەسسيۆتى توپتاردىڭ تەلەارنا جۋرناليستەرىنە، وكىلدەرىنە دەگەن وشپەندىلىگى ارتۋى مۇمكىن ەكەندىگىن ايتادى.
«بۇنىڭ سالدارى جاۋاپكەر تاراپ ءۇشىن جاعىمسىز اياقتالۋى مۇمكىن. بەيتاراپ تۇلعالار ءۇشىن ينتەرنەتكە سالىناتىن فوتو، ۆيدەو ماتەريالدار «مىستاندارعا سوعىس اشۋعا» سەبەپ بولۋى مۇمكىن. سوندىقتان مەن ءوزىمنىڭ تانىمال بولعىم كەلمەيتىنى تۇسىنىكتى دەپ ويلايمىن»، - دەيدى «ەۋرازيا» زاڭگەرى.
ارىزدانۋشى ن. جۇمابەكوۆ تە سوت بارىسىندا جاۋاپكەر تاراپتان ءوزىن باق-پەن ءبىر قاتارعا قويماۋىن سۇرادى.
