يندونەزيادا جۇرگىزىلگەن اۋقىمدى ارنايى وپەراسيا بارىسىندا ەسىرتكى ساۋداسىنا قاتىسى بار دەگەن كۇدىكپەن 285 ادام ۇستالدى. ولاردىڭ قاتارىندا 29 ايەل مەن جەتى شەتەلدىك ازامات بار. شەتەلدىكتەردىڭ اراسىندا ەكى قازاقستاندىق تا بار ەكەنىن Associated Press اگەنتتىگى مالىمدەدى، دەپ حابارلايدى Dalanews.kz.

يندونەزيا ۇلتتىق ەسىرتكىمەن كۇرەس اگەنتتىگىنىڭ مالىمەتىنشە، ءساۋىر مەن ماۋسىم ارالىعىندا ەلدىڭ 20 پروۆينسياسىندا جۇرگىزىلگەن رەيد ناتيجەسىندە 0،68 توننادان استام ەسىرتكى – كريستالدىق مەتامفەتامين، ماريحۋانا، ەكستازي، تگك، گاشيش جانە امفەتامين تاركىلەنگەن. بۇل – 1،3 ميلليون ادامدى ۋلانۋدان قۇتقارۋعا مۇمكىندىك بەردى دەگەن ءسوز.

ءتارتىپ ساقشىلارىنىڭ ايتۋىنشا، ەسىرتكى زاتتارى قۇرلىقپەن دە، تەڭىز ارقىلى دا، پوشتا قىزمەتى ارقىلى دا تاراتىلىپ كەلگەن. سونىمەن قاتار ەكى ءىرى ەسىرتكى سينديكاتى قارجىنى زاڭداستىرۋ بويىنشا كۇردەلى سحەما قۇرعانى انىقتالىپ، 1،5 ميلليون اقش دوللارىنا تەڭ مۇلىك تاركىلەنگەن.

"يندونەزيادا ەسىرتكى قىلمىسى ءۇشىن ەڭ اۋىر جازا – اتۋ جازاسى قاراستىرىلعان. سوعان قاراماستان، ەل وڭتۇستىك-شىعىس ازياداعى ەسىرتكى ءترانزيتىنىڭ باستى نۇكتەلەرىنىڭ ءبىرى بولىپ قالا بەرۋدە"، - دەيدى اگەنتتىك. 

ءقازىر يندونەزيادا 530-عا جۋىق ادام، ونىڭ ىشىندە 96 شەتەلدىك ازامات ءولىم جازاسىن كۇتىپ وتىر. سوڭعى رەت بۇل جازا 2016 جىلى ورىندالعان: اتىلعانداردىڭ اراسىندا ءبىر يندونەزيالىق پەن ءۇش شەتەلدىك بولعان.

قازىرگى ۋاقىتتا ۇستالعان شەتەلدىكتەردىڭ تاعدىرى — يندونەزيانىڭ قاتال زاڭدارى مەن حالىقارالىق قىسىم اراسىنداعى كۇردەلى ماسەلەگە اينالىپ وتىر. ەكى قازاقستاندىقتىڭ ءاتى-جونى مەن رەسمي مالىمەتتەر ازىرگە جاريالانبادى.