Indoneziiada júrgizilgen aýqymdy arnaiy operatsiia barysynda esirtki saýdasyna qatysy bar degen kúdikpen 285 adam ustaldy. Olardyń qatarynda 29 áiel men jeti sheteldik azamat bar. Sheteldikterdiń arasynda eki qazaqstandyq ta bar ekenin Associated Press agenttigi málimdedi, dep habarlaidy Dalanews.kz.
Indoneziia ulttyq esirtkimen kúres agenttiginiń málimetinshe, sáýir men maýsym aralyǵynda eldiń 20 provintsiiasynda júrgizilgen reid nátijesinde 0,68 tonnadan astam esirtki – kristaldyq metamfetamin, marihýana, ekstazi, TGK, gashish jáne amfetamin tárkilengen. Bul – 1,3 million adamdy ýlanýdan qutqarýǵa múmkindik berdi degen sóz.
Tártip saqshylarynyń aitýynsha, esirtki zattary qurlyqpen de, teńiz arqyly da, poshta qyzmeti arqyly da taratylyp kelgen. Sonymen qatar eki iri esirtki sindikaty qarjyny zańdastyrý boiynsha kúrdeli shema qurǵany anyqtalyp, 1,5 million AQSh dollaryna teń múlik tárkilengen.
"Indoneziiada esirtki qylmysy úshin eń aýyr jaza – atý jazasy qarastyrylǵan. Soǵan qaramastan, el Ońtústik-Shyǵys Aziiadaǵy esirtki tranzitiniń basty núkteleriniń biri bolyp qala berýde", - deidi agenttik.
Qazir Indoneziiada 530-ǵa jýyq adam, onyń ishinde 96 sheteldik azamat ólim jazasyn kútip otyr. Sońǵy ret bul jaza 2016 jyly oryndalǵan: atylǵandardyń arasynda bir indoneziialyq pen úsh sheteldik bolǵan.
Qazirgi ýaqytta ustalǵan sheteldikterdiń taǵdyry — Indoneziianyń qatal zańdary men halyqaralyq qysym arasyndaǵy kúrdeli máselege ainalyp otyr. Eki qazaqstandyqtyń aty-jóni men resmi málimetter ázirge jariialanbady.
