مەملەكەتتىك كەڭەسشى ەرلان قارين پارلامەنت ماجىلىسىندەگى التى ساياسي پارتيانىڭ فراكسيا جەتەكشىلەرىمەن كەزدەسۋ وتكىزدى، دەپ حابارلايدى Dalanews.kz.
ءىس-شاراعا Amanat پارتياسى فراكسياسىنىڭ جەتەكشىسى ەلنۇر بەيسەنبايەۆ، “اۋىل” حالىقتىق-دەموكراتيالىق پاتريوتتىق پارتياسى فراكسياسىنىڭ جەتەكشىسى سەرىك ەگىزبايەۆ، Respublica پارتياسى فراكسياسىنىڭ جەتەكشىسى ايداربەك قوجانازاروۆ، “اق جول” قازاقستان دەموكراتيالىق پارتياسى فراكسياسىنىڭ جەتەكشىسى ازات پەرۋاشيەۆ، قازاقستان حالىق پارتياسى فراكسياسىنىڭ جەتەكشىسى ماگەررام ماگەرراموۆ، جالپىۇلتتىق سوسيال-دەموكراتيالىق پارتياسى فراكسياسىنىڭ جەتەكشىسى اسحات راقىمجانوۆ، سونداي-اق پرەزيدەنتتىڭ پارلامەنتتەگى وكىلدىگىنىڭ باسشىسى امىربەك وسپانبەكوۆ قاتىستى.
“باسقوسۋعا قاتىسۋشىلار ۇلتتىق قۇرىلتايدىڭ “ادال ادام — ادال ەڭبەك — ادال تابىس” اتتى ءۇشىنشى وتىرىسىندا مەملەكەت باسشىسى بەرگەن تاپسىرمالار مەن باستامالاردى ءتيىمدى جۇزەگە اسىرۋ جولدارى مەن تاسىلدەرى جونىندە پىكىر الماستى”، - دەلىنگەن اقوردا جاريالاعان حابارلامادا.
مەملەكەتتىك كەڭەسشى پرەزيدەنتتىڭ كوپتەگەن باستاماسىن ناقتى ورىنداۋ ءۇشىن زاڭنامالىق تۇرعىدان قولداۋ كورسەتۋ جانە وعان دەپۋتاتتاردىڭ بەلسەندى اتسالىسۋى قاجەت ەكەنىن اتاپ ءوتتى.
ەڭ الدىمەن، ەسىرتكى ءوندىرۋ، لۋدومانيا، ۆانداليزم، تۇرمىستىق زورلىق-زومبىلىق ءۇشىن جاۋاپكەرشىلىكتى كۇشەيتۋ، سونداي-اق مەملەكەتتىك ناگرادالار، ونوماستيكا، ارحەولوگيالىق قىزمەت تۋرالى جانە باسقا دا زاڭدارعا تۇزەتۋ ەنگىزۋ قاجەت.
جيىندا ونوماستيكا، ەسىرتكىگە جانە ۆانداليزمگە قارسى كۇرەس تۋرالى زاڭ جوبالارى ءماجىلىستىڭ قاراۋىندا، ال تۇرمىستىق زورلىق-زومبىلىققا قارسى كۇرەس تۋرالى زاڭدى ءماجىلىس قابىلداپ، قۇجاتتىڭ سەناتقا جىبەرىلگەنىنە نازار اۋدارىلدى.
بۇل رەتتە ۆانداليزم دەگەنىمىز ەسكەرتكىشتەر مەن تابيعي نىسانداردى عانا ەمەس، قوعامدىق ورىنداعى مۇلىكتى دە ءبۇلدىرۋ ەكەنىنە باسا ءمان بەرىلدى.
دەپۋتاتتار ۆانداليزم جانە باسقا دا تۇرمىستىق قۇقىق بۇزۋشىلىقتار ءۇشىن جازانى قاتاڭداتۋ قاجەتتىگىن ايتتى.
سونداي-اق فراكسيا جەتەكشىلەرى پرەزيدەنت ۇسىنعان جالپىۇلتتىق قۇندىلىقتاردى دارىپتەۋگە قاتىستى ۇسىنىستارىن ورتاعا سالدى.
