مەملەكەت باسشىسى جاڭا ءمينيستردىڭ ءبىلىمى مەن تاجىريبەسى قارۋلى كۇشتەرگە جۇكتەلەتىن مىندەتتەردى ورىنداۋعا سەپتىگىن تيگىزەتىنىنە سەنىم ءبىلدىردى.
پرەزيدەنت ارىس پەن جامبىل وبلىسىنىڭ بايزاق اۋدانىنداعىداي توتەنشە وقيعالارعا جول بەرمەۋدىڭ اسا ماڭىزدى ەكەنىنە توقتالدى. بۇل رەتتە جوعارعى باس قولباسشى وق-دارىلەر قويمالارىنداعى قاۋىپسىزدىكتى قامتاماسىز ەتۋ جونىندە بەرگەن تاپسىرماسىن اسكەريلەردىڭ ەسىنە سالىپ، بۇل باعىتتا ءبىرقاتار جۇمىستار جاسالعانىن، دەگەنمەن ءالى دە شەشىمىن كۇتكەن ءتۇيىندى ماسەلەلەردىڭ بار ەكەنىن ايتتى.
مەملەكەت باسشىسى قورعانىس مينيسترلىگىنە ءبىرقاتار مىندەت جۇكتەدى.
مەملەكەت باسشىسى جيىن سوڭىندا جاڭا مينيسترگە جانە بارلىق اسكەريلەرگە اسا جاۋاپتى قىزمەتتە تابىس تىلەدى. تاعايىندالعان مينيستر مۇرات بەكتانوۆ ۇكىمەت مۇشەسى رەتىندە انت قابىلدادى.
جيىن بارىسىندا وتستاۆكاعا كەتكەن بۇرىنعى مينيستر نۇرلان ەرمەكبايەۆ ءسوز سويلەپ، پرەزيدەنتتەن، جامبىل وبلىسىنىڭ بايزاق اۋدانىندا بولعان قايعىلى وقيعادان قازا تاپقانداردىڭ اعايىن-تۋىسىنان جانە زارداپ شەككەندەردەن كەشىرىم سۇرادى.
بۇعان دەيىن قورعانىس ءمينيسترى نۇرلان ەرمەكبايەۆ جامبىل وبلىسىندا بولعان جارىلىستاردان كەيىن وتستاۆكاعا كەتكەن بولاتىن.
كەيىن قازاقستان قورعانىس ءمينيسترىنىڭ ءبىرىنشى ورىنباسارى - ق ر قارۋلى كۇشتەرى باس شتابىنىڭ باستىعى مۇرات بەكتانوۆ قازاقستاننىڭ قورعانىس ءمينيسترى بولىپ تاعايىندالدى.
ەسكە سالايىق، 26 تامىزدا جامبىل وبلىسى بايزاق اۋدانىندا ورنالاسقان اسكەري بولىمدە ساعات 19.00 شاماسىندا قويمالاردىڭ ءبىرىنىڭ جانىندا ءورت شىققان. ءورت سالدارىنان انىقتالماعان زاتتار جارىلعان. ەرمەكبايەۆتىڭ جۇمىسى كەزىندە مۇنداي جاعداي ەكىنشى رەت قايتالانىپ وتىر. 2019 جىلى ارىستا جويقىن جارىلىستار بولعان ەدى.
