كييەۆكە بارعان قازاقستاندىق بەلسەندىلەر ەرمەك نارىمبايەۆ پەن ءمولدىر اديلوۆا «وتانىمىزدا ساياسي قۇقىقتارىمىز شەكتەلدى» دەپ مالىمدەدى.
بۇل تۋرالى ازاتتىق راديوسى حابارلاپ وتىر.
قازاقستاندىق ازاماتتىق بەلسەندىلەر ەرمەك نارىمبايەۆ پەن ءمولدىر اديلوۆا بۇگىن ۋكراينا استاناسى كييەۆ قالاسىندا باسپا ءسوز ءماسليحاتىن وتكىزدى. باسپا ءسوز جيىنىن جۇرگىزىپ وتىرعان ازامات، ءوزى دە بۇعان دەيىن قازاقستاننان ۋكرايناعا كەتىپ قالعان قوعامدىق بەلسەندى ايدوس سادىقوۆ ولاردى «تۇتقىندالۋ ءقاۋپى تۋعان سوڭ وتاندارىنان كەتكەن ادامدار» دەپ تانىستىردى.
[caption id="attachment_17576" align="alignright" width="987"]
ەرمەك نارىمبايەۆ (سول جاقتا) پەن ايدوس سادىقوۆ جانە باسپا ءسوز ءماسليحاتىندا. كييەۆ، 15 شىلدە 2016 جىل.[/caption]
«ساياسي قۇقىقتارىمىز شەكتەلدى»
ەرمەك نارىمبايەۆ ءساۋىر ايىنان باستاپ قازاقستاننىڭ بىرنەشە قالاسىندا جەرگە قاتىستى ميتينگىلەر وتكەن سوڭ ءوزىنىڭ قۋعىن كورە باستاعانىن مادىمدەدى. «قورعالۋ قۇقىعى بار كۋاگەر» ستاتۋسىن الىپ، «كەز-كەلگەن ءساتتى ايىپتالۋشىعا اينالۋ قاۋپىنە ىلىككەنىن» ايتقان بەلسەندى سوڭعى كەزدەرى ۇنەمى اڭدۋدا بولعانىن باياندادى.
– ماعان سوت ۇكىمى بويىنشا شەتەلگە كەتۋىمە تىيىم سالىنعان. كەيبىرەۋلەر ويلاعانداي، بيلىكپەن قانداي دا ءبىر كەلىسىمگە كەلگەنىمىز جوق. سوڭىمىزدان اڭدىعان قاۋىپسىزدىك كوميتەتىنىڭ قىزمەتكەرلەرى اۋىسىپ، ءسال قاپەرسىز قالاتىن دەمالىس ساتتە قاشىپ شىقتىق. كورشىلەس ەلدىڭ ءبىرىنىڭ شەكاراسىنان زاڭسىز وتتىك، – دەدى ول.
بيىل اقپان ايىندا ءۇش جىلعا شارتتى جازاعا كەسىلگەن ەرمەك نارىمبايەۆ ۋكرايناعا قاشۋ سەبەبىن «قازاقستاندا مۇنان ءارى ءومىر ءسۇرۋ مۇمكىن بولماعانىمەن» تۇسىندىرەدى.
– قازاقستان كونستيتۋسياسىندا كەپىلدىك بەرىلگەن ساياسي قۇقىقتارىمدى تالاپ ەتكەنىم ءۇشىن بىرنەشە رەت قىلمىستىق، اكىمشىلىك جازاعا تارتىلدىم. ءتىپتى جاقىندا مەنى تەرروريستەر قاتارىنا قوسىپ قويدى. ءسويتىپ بانكتەن وزىمە تيەسىلى قاراجاتتى الۋ مۇمكىندىگىنەن ايىردى. سوت شەشىمى بويىنشا ماعان بەس جىلعا دەيىن قوعامدىق جۇمىسپەن شۇعىلدانۋعا دا تىيىم سالىندى، – دەيدى ول.
ەرمەك نارىمبايەۆتىڭ ۋكرايناعا كەتۋىن قازاقستانداعى قوعامدىق بەلسەندىلەر مەن الەۋمەتتىك جەلى قولدانۋشىلارى تۇرلىشە قابىلداعان. كەيبىرى ونىڭ بۇل شەشىمىن قولداماسا، كەيبىرى «امالسىزدان جاسالعان قادام» دەپ ەسەپتەيتىنىن بىلدىرگەن.
ساياساتتانۋشى ايدوس سارىم Facebook جەلىسىندە «ەميگراسياعا ادام ماجبۇرلىكتەن كەتەتىنىن، ءبىراق وندا ءومىر ءسۇرۋ دە وڭاي ەمەس ەكەنىن» ايتادى. ول «بۇل قادامنىڭ ەرمەك نارىمبايەۆ ءۇشىن ساياسي، قۇقىقتىق سالدارى بولۋى مۇمكىن» ەكەنىن ايتادى.
انىقتاما
ەرمەك نارىمبايەۆ 2000-2001 جىلدارى قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىندا جۇمىس ىستەگەن.
قازاق-وزبەك شەكاراسىن دەماركاسيالاۋدان كەيىن وزبەكستانعا بەرىلەتىن وڭتۇستىك قازاقستان وبلىسىنداعى باعىس پەن تۇركىستان اۋىلدارىن قورعاۋ جونىندە جاستار قوعامدىق كوميتەتىن قۇرعان. 2009 جىلى «ارمان» قوزعالىسىن قۇرىپ، يپوتەكالىق نەسيە الۋشىلار قۇقىعىن قورعاۋمەن كوزگە تۇسكەن.
نارىمبايەۆ بيىل قاڭتاردا قىلمىستىق كودەكستىڭ 174-بابىنىڭ 2-تارماعى بويىنشا («الەۋمەتتىك، ۇلتتىق الاۋىزدىق تۋدىرۋ») ايىپتالعان. ول تاعى ءبىر بەلسەندى سەرىكجان مامبەتالين ەكەۋى الەۋمەتتىك جەلىدە اۆتورى مۇرات تەلىبەكوۆ دەلىنەتىن كىتاپتان ءۇزىندى كەلتىرگەنى ءۇشىن ايىپتى بولعان.
اپەللياسيالىق سوت نارىمبايەۆتىڭ تەرگەۋ اباقتىسىندا وتكىزگەن ۋاقىتىن ەسكەرىپ، ونىڭ سوت كەسكەن جازا مەرزىمىن جەڭىلدەتىپ، ءۇش جىلعا باس بوستاندىعىن شەكتەگەن.
