شارا اياسىندا وبلىس اكىمى جانسەيىت تۇيمەبايەۆ باستاعان ءوڭىر ارداگەرلەرى مەن زيالى قاۋىم وكىلدەرى «جەڭىس» ساياباعىنداعى ۇلى وتان سوعىسىنىڭ باتىرى، گەنەرال سابىر راقىموۆتىڭ ەسكەرتكىشىنە گۇل شوقتارىن قويدى. جيىندا ايماق باسشىسى جانسەيىت قانسەيىت ۇلى جۇرتشىلىقتى جاڭا عيماراتتىڭ اشىلۋىمەن قۇتتىقتادى.
– قوعامدىق سانانى جاڭعىرتۋعا باعىتتالعان ەلباسى نۇرسۇلتان ءابىش ۇلى نازاربايەۆتىڭ «رۋحاني جاڭعىرۋ» باعدارلاماسىنىڭ ۇسىنىلۋى زامان تالابىنا ساي ماڭىزدى شەشىم بولدى. بۇگىنگى شارا - ەرلىكتى دارىپتەۋگە، جاستاردىڭ بويىنا وتانشىلدىق سەزىمدى سىڭىرۋگە باعىتتالعان. باتىرلارىمىزدىڭ، اتا-اجەلەرىمىزدىڭ ۇلى وتان سوعىسى جىلدارىنداعى ەرلىكتەرى مەن جەڭىستەرىن، تىلداعى ەڭبەكتەرىن، اۋعان سوعىسى ارداگەرلەرىنىڭ ەرجۇرەكتىلىگىن ناسيحاتتايتىن بۇل مۋزەيدىڭ ماڭىزى جوعارى. جاستاردى وتانشىلدىققا تاريبەلەۋدە بۇل ورتالىقتىڭ دا قوسار ۇلەسى مول، – دەدى ءوڭىر باسشىسى.
«ەرلىك» مۋزەيى 2012 جىلى جەلتوقسان ايىندا اشىلىپ، 2013 جىلى 19 شىلدەدە وقو تاريحي-ولكەتانۋ مۋزەيىنىڭ «ەرلىك» فيليالى رەتىندە رەسىمدەلگەن. عيماراتتىڭ اۋماعى بۇرىن 209،6 شارشى مەتر بولسا، وبلىس اكىمدىگىنىڭ قولداۋىمەن قوسىمشا قۇرىلىس جۇرگىزىلىپ، 285 شارشى مەترگە جاڭا عيمارات سالىنىپ وتىر. جاڭادان اشىلعان ەكى قاباتتى عيماراتتا ەكى ەكسپوزيسيالىق زال، 50 ورىندىق ءماجىلىس زالى، ەكسپوناتتاردى ساقتايتىن جانە قىزمەتكەرلەر جۇمىس ىستەيتىن بولمەلەر بار. بۇل مۇراجايدا سوعىس ارداگەرلەرىنىڭ ەرلىكتەرىن دارىپتەۋمەن قاتار زيالى قاۋىم وكىلدەرىمەن كەزدەسۋلەر جانە وزگە دە تاريحي-تانىمدىق ءىس-شارالار وتكىزىلەتىن بولادى.
