«...مەنىڭ بايقاعانىم، تورگاشتاردىڭ تۇقىمىنان ەشقاشان مەملەكەتشىل تۇلعا شىقپايدى ەكەن.
ولار ءارتۇرلى شەتەلدىك ەكسپانسيالىق، ديۆەرسيالىق جوبالاردان دەلدال بولىپ ۇلەس الىپ، اقشا تابۋ ءۇشىن ۇنەمى مەملەكەت مۇددەسىنە قارسى ارەكەت ەتەدى.
ال جەمقورلاردىڭ جيىلىپ پارتيا قۇرا المايتىن سەبەبى، ولار – مەملەكەت بيۋدجەتىن توناپ بايىعاندار، ياعني شەنەۋنىك تونىن جامىلىپ الىپ، مەملەكەت قازىناسىن توناعان قاراقشىلار. ال قاراقشىدا مەملەكەتتىك، ۇلتتىق سانا بولمايدى.
ولار ەشقاشان مەملەكتتىك سانا بيىگىنە كوتەرىلە المايدى. ال وپپوزيسيالىق پارتيانىڭ دەنى مەملەكەتشىل تۇلعالاردان، ۇلتتىق بۋرجۋازيا الپاۋىتتارىنان جاساقتالۋى ءتيىس.
كەزىندە بيلىك بۋتيا باستاعان كەلەشەك ۇلتتىق بۋرجۋازيا وليگارحتارىنىڭ كورىن ءوز قولىمەن قازدى. كارمەتكومبيناتتى بۋتيادان تارتىپ الىپ، ءۇندىستان ەۆرەيى لاكشمي ميتتالعا سۋ تەگىنگە بەرە سالعانى ەسىڭىزدە شىعار. بيلىك ەگەر جورگەگىندە تۇنشىقتىرماعاندا جەراستى بايلىعى مول مەملەكەتتە ۇلتتىق بۋرجۋازيا از ۋاقىتتا ەسەپسىز بايىپ، ءوزىنىڭ بيلىگىنە يە بەرمەي كەتەتىنىن بىردەن سەزدى.
سەزدى دە ۇلتتىق بۋرجۋازيانى قۇردىمعا جىبەردى. ءسويتتى دە ماڭايىنا ساۋداگەرلەردىڭ تۇقىمى – وڭشەڭ جەمقورلاردى جيىپ الىپ، ءوزىنىڭ وتىز جىلدىق بيلىگىن قامتاماسىز ەتتى.
ال ۇلتتىق بۋرجۋازيا بولسا قازاقتا ءالى جوق. قازاق ۇلتتىق بۋرجۋازياسىنىڭ جوقتىعىنىڭ سازايىن ءالى تالاي زامان تارتاتىن بولادى.
سەبەبى ۇلتتىق بۋرجۋازياسى جوق ەلگە كورىنگەن ترانسكونتينەنتالدى كومپانيالار، جۇڭگو سياقتى اجداھا مەملەكەتتەر قوجا بولىپ الادى. الدى دا!
قازىرگى قازاق بيلىگىندە قونايەۆ زامانىنان كەلە جاتقان تورگاشتاردىڭ تۇقىمدارى وتە كوپ! ولار اقشا ءۇشىن شەتەلدىك كومپانيالاردىڭ ىقپالىنا تەز تۇسەدى، ءسويتىپ مەملەكەت مۇددەسىن ارسىزدىقپەن ساتىپ جىبەرىپ جاتىر. سونىڭ ءبىر ايعاعى لوندونعا جيىلعان ەل توناپ، ەسەپسىز بايىعان قاشقىن قاراقشىلار قۇرىلعالى جاتقان جالعىز وپپوزيسيالىق پارتيانى ساتىپ جىبەردى.
ەگەر ۇلتتىق بۋرجۋازيا بولعاندا قازاق قوعامىنداعى قازىرگى سيتۋاسيا مۇلدە باسقاشا سيپاتتا ءوربىر ەدى.
مەن ساياساتتىڭ ساسىق اۋىلىندا شوشايىپ جالعىز قالعان ەرمۇرات باپي اعامدى تۇسىنەمىن، ءبىراق امال نەشىك، ۇلتتىق بۋرجۋازياسى، مەملەكەتشىل تۇلعالارى جوق ەلدىڭ ساياسي ءومىرىنىڭ سيقى وسىلاي بولىپ قالا بەرمەك».
P.S. «ۇلتتىق بيزنەس وكىلدەرىنىڭ قۇلاقتارىنا التىن سىرعا. ءيا، وپپوزيسيالىق قوزعالىسقا بيزنەس كەلىپ قوسىلمايىنشا، اركىم «ءوز قوتىرىن» ءوزى قاسىپ، «سەن تيمەسەڭ، مەن تيمەن، بادىراق كوز» بولىپ جۇرە بەرمەك. وپپوزيسيا تۇگىل، وسى فەيسبۋكتى ءسۇزىپ شىعالىق: مۇندا مارعۇلان سەيسەمباي مەن Zeinulla Kakimzhanovتان باسقا ۇلتتىق بيزنەستىڭ ءىرى وكىلدەرى بار ما ەكەن؟ بەتكە باسار ون بيزنەسمەن تابا الار ما ەكەنسىز؟»، – دەيدى جۋرناليست ەرمۇرات باپي.
