– بۇگىنگى تاڭدا ەل حالقىنىڭ دەموكراتياعا دەگەن سۇرانىسى جوعارى. ال بارلىق ساياسي پروسەستەر وسى سۇرانىسقا جاۋاپ بەرۋ ماقساتىندا قولعا الىنۋدا.
الدىمىزدا پارلامەنت ءماجىلىسى دەپۋتاتتارىنىڭ كەزەكتى سايلاۋى كەلە جاتىر. بۇل قوعامداعى الەۋمەتتىك ماسەلەلەردى كوتەرەتىن جاڭا ليدەرلەردى ىرىكتەۋدىڭ مۇمكىندىگى. وسى ورايدا ازاماتتاردىڭ ساياسي بەلسەندىلىگىن ارتتىرۋ كەرەك.
قازاقستان تۇراقسىز الەمدەگى تۇراقتى مەملەكەتتەردىڭ ءبىرى. مىنە، ءبىز وسىنى ساقتاۋىمىز قاجەت. ساياسي تۇراقتىلىق – باستى قۇندىلىق، – دەدى ەرلان سايروۆ.
ونىڭ ايتۋىنشا، ق ر پرەزيدەنتى قاسىم-جومارت توقايەۆتىڭ باستاماسىمەن قوعام سۇرانىستارىنا وراي زاڭعا ءبىرشاما وزگەرىستەر ەنگىزىلىپ، تالاي يگى شارالار قولعا الىنۋدا.
– بۇل رەتتە «حالىق ۇنىنە قۇلاق اساتىن مەملەكەت» تۇجىرىمداماسىنا ساي كەلەتىن ميتينگ تۋرالى زاڭدى ايتۋعا بولادى. ال سايلاۋ تۋرالى جاڭا زاڭنىڭ ناتيجەسىندە پارتيا تىزىمىندە ايەلدەر مەن جاستارعا 30 پايىزدىق كۆوتا بەرىلگەندىگى بەلگىلى. بۇكىل الەمدى قىسپاققا العان كوروناۆيرۋس پاندەمياسىنا قاراماستان ەلىمىزدە الەۋمەتتىك سالاعا باسا ءمان بەرىلۋدە. سوڭعى 4 جىلدا قازاقستاندا 3 مىڭنان استام بالاباقشا، 2 مىڭنان استام مەكتەپ سالىنعان. وسىنداي وڭدى وزگەرىستەردىڭ ارقاسىندا حالىقتىڭ بيلىككە دەگەن سەنىمى ارتىپ كەلەدى، – دەدى ەۋرازيالىق ينتەگراسيا ينستيتۋتىنىڭ ديرەكتورى.
ءوز سوزىندە ول جۇرتشىلىقتى پارلامەنت ءماجىلىسى دەپۋتاتتارىنىڭ سايلاۋىنا بەلسەندى قاتىسۋعا شاقىردى.
