مەملەكەتتىك كەڭەسشى ەرلان قارين «Qazaqstan» تەلەارناسىنىڭ «باس تاقىرىپ» باعدارلاماسىنا بەرگەن سۇحباتىندا ەلىمىزدەگى ونوماستيكا سالاسىنداعى ماسەلەلەردىڭ بۇگىنگى بەتالىسىنا توقتالىپ، وسى باعىتتاعى بولاشاق ءىس-شارالار جايىندا ءوز ويىمەن ءبولىستى، - دەپ جازادى Dalanews.kz.
ەرلان ءقاريننىڭ ايتۋىنشا، ونوماستيكا سالاسىنداعى شەشىمدەردى ايماقتار وسى كۇنگە دەيىن ءوز بەتىنشە قابىلداپ كەلگەن. بۇل كەيدە جەرگىلىكتى دەڭگەيدەگى ءبىرجاقتى شەشىمدەرگە اكەلىپ، تۇلعالار مەن تاريحي اتاۋلاردىڭ ادىلەتسىز دارىپتەلۋىنە سەبەپ بولعان.
سوندىقتان قازىرگى باستى باعىت – ونوماستيكا ماسەلەسىن ورتالىقتاندىرۋ. بۇل ايماقتاردان قۇزىرەتتى تولىق تارتىپ الۋ ەمەس، كەرىسىنشە، ماسەلەلەردى جۇيەلى ءارى ۇيلەسىمدى تۇردە شەشۋگە مۇمكىندىك بەرۋ. بۇدان بىلاي ايماقتار ءوز ۇسىنىستارىن ورتالىقپەن، مينيسترلىكپەن جانە پرەزيدەنت اكىمشىلىگىمەن اقىلداسا وتىرىپ جۇزەگە اسىرادى.
ۇسىنىستاردى قاراستىرۋ كەزىندە باسىمدىق جاڭادان قوسىلىپ جاتقان ەلدىمەكەندەر مەن كوشەلەرگە بەرىلەدى. سونىمەن قاتار، تاريحي تۇلعالاردىڭ اتتارىن تەڭ دارەجەدە دارىپتەۋ ماقسات ەتىلىپ وتىر:
«ۇلى اباي تەك شىعىس ءوڭىردىڭ تۇلعاسى بولماۋى كەرەك، ءاليا مولداعۇلوۆا تەك باتىس ءوڭىرىنىڭ تۇلعاسى بولىپ قالىپتاسپاۋى كەرەك. قازىرگى تالاپ بويىنشا، اتاۋلاردى تاڭداۋدا ادام ەسىمدەرىنە شەكتەن تىس باسىمدىق بەرىلمەي، جەر-سۋ، ۇلتتىق قۇندىلىقتاردى بەينەلەيتىن اتاۋلارعا ەرەكشە نازار اۋدارىلادى. مىسالى، كوشەلەردىڭ 10 پايىزىنا عانا بەلگىلى تۇلعالاردىڭ ەسىمدەرى بەرىلەدى، قالعاندارىنا «ىنتىماق»، «تاۋەلسىزدىك»، «بەيبىتشىلىك» سياقتى جالپىۇلتتىق بىرلىكتى بىلدىرەتىن شارتتى اتاۋلار بەرىلۋى ۇسىنىلادى»، - دەدى ەرلان قارين وسى تۇستا.
ونوماستيكا مەن ەسكەرتكىشتەر ۇلتتىڭ رۋحاني كودى مەن تاريحي ساناسىن قالىپتاستىراتىن باستى قۇرال.
بۇعان دەيىن Dalanews-كە پىكىر بىلدىرگەن ساراپشىلار، بيلىك ونوماستيكا سالاسىن ورتالىقتاندىرۋ ارقىلى سالادا ادىلەتتىلىك پەن جۇيەلىلىككە قول جەتكىزۋدى ماقسات تۇتاتىنىن ايتقان. ۇتىمدى شەشىمدەر مەن ۇيلەسىمدى قادامدار عانا تاريحي مۇرالارىمىزدى كەلەر ۇرپاققا لايىقتى جەتكىزۋدىڭ كەپىلى بولماق.
