بۇگىن سافاردىڭ دەنەسىن جەر قوينىنا تاپسىرماس بۇرىن اكەسى مەن دوستارى، ومىرلىك ۇستازدارى ونىڭ ىزگى قاسيەتتەرى تۋرالى ايتىپ، بالالىق شاعى تۋرالى ەستەلىكتەرىمەن ءبولىستى. بارلىعى مارقۇمنىڭ كوزى تىرىسىندە جاقسى ادام بولعانىن تىلگە تيەك ەتتى.
ءراسىم اياقتالعان سوڭ يمام جۇرتتىڭ كوزىنشە اكەسىنەن “سافاردىڭ مىنا جالعاندا قارىزى قالدى ما؟” دەپ سۇرادى.
اكەسى:
“بالام ەشكىمگە ەشنارسە قارىز ەمەس. ول ادال ءومىر ءسۇردى. باسىندا جابىلماعان ءبىر نەسيەسى بار. ءمىنىپ جۇرگەن كولىگىن ءوزىم تولەيمىن دەپ نەسيەگە الىپ ەدى. بۇل ماسەلەنى ءوزىم جىلدامىراق رەتتەيمىن”، — دەپ جاۋاپ بەردى.
بۇدان كەيىن يمام جينالعان قاۋىمنان مارقۇمدى قارىزدارى ءۇشىن كەشىرۋدى سۇرادى.
ودان كەيىن جينالعان قاۋىم الدىنا ەركەش شاكەيەۆ شىعىپ، بالاسى تۋرالى تەبىرەنە ءسوز ايتتى. قايعى جۇتقان اكە سوزىنەن كوزىنە جاس الماعان ادام بولمادى.
“سافاردىڭ مىنەزى جايلى ايتىپ اۋرە بولمايىن. ونىڭ قانداي ادام بولعانىن، سۋرەتىنە قاراپ-اق بىلە بەرسەڭىزدەر بولادى. مەملەكەتىمىزدىڭ مۇنداي ادامنان ايىرىلىپ قالعانى وكىنىشتى. بىزگە سافار سەكىلدى ادامدار اۋاداي قاجەت. دوستارىم بالالارىنا “سافاردان ۇلگى الىڭدار” دەپ ايتاتىن. مەنى جاقسى تانيتىن جاندار ومىردە ءتۇزۋ جولمەن ءجۇرىپ، ءاردايىم تاباندىلىق تانىتاتىنىمدى بىلەدى.
جەر بەتىندە بىرەۋدىڭ الا ءجىبىن اتتاپ، قارىز دا الىپ كورگەن ەمەسپىن. نانىمدى ادال تاۋىپ جەدىم.
بۇل مەنىڭ عانا ەمەس، وتباسىمنىڭ دا تىرەگى.
سافاردى ۇلكەن ومىرگە دايىنداپ، سپورتتىق جارىستارعا قاتىستىردىم. ءبىلىم الۋىنا جاعداي جاساپ، ءتىل ۇيرەتتىم. ونىڭ ءومىرى تىم قىسقا بولدى. ءبىراق جۇلدىزداي ءبىر جارق ەتكەنى انىق. ارامىزدا ەشبىر تۇسىنىسپەۋشىلىك بولعان ەمەس. ۇزاق وتىرىپ سىرلاساتىنبىز دا. ول ماعان ءومىرىمنىڭ ءمانىن تابۋعا كومەكتەستى.
ءدال وسى ءساتتى پايدالانىپ الەۋمەتتىك-تۇرمىستىق جاعدايىما قاتىستى مالىمدەمە جاساعىم كەلىپ تۇر. ءوزىم اشىپ وقىماسام دا، كەي ادام مەن باسىلىمدار سافار تۋرالى جاعىمسىز دۇنيە جازعانىن ەستىدىم.
ونى “اكەسىنىڭ ارقاسىندا ءومىر ءسۇرىپ جۇرگەن ەركە ۇل” دەپتى. جوق، مەن ەشقانداي دا ميلليونەر ەمەسپىن.
سافار كوزى تىرىسىندە دە “اكە، جۇرت ءسىزدى دوستارىڭىزعا قاراپ ميلليونەر دەپ ويلايدى” دەۋشى ەدى. مەن ولارمەن اقشاسى ءۇشىن ەمەس، تەك ادامگەرشىلىكتەرى ءۇشىن عانا دوس بولامىن عوي. ءبىز قاراپايىم وتباسىمىز. ايەلىم جاننا ازىق-تۇلىكتى ماگنۋمنەن بارىپ ساتىپ الادى. وزدەرىڭىز ويلاپ كورىڭىزدەرشى، ميلليونەرلەر ءدال سونداي جەرگە بارا ما؟
اتا-انالار، بالالارىڭىز كىممەن دوستاسىپ جۇرگەنىنە نازار اۋدارىڭىزدار. سافار سوڭعى كەزدە كوپتەگەن كەزدەسۋگە بارىپ، ءوزى بارماۋى ءتيىس جەردە جۇرگەن بولار.
ءبىراق، ونىڭ شىنايى دوستارى التىن ادامدار. جاندارى جاقسىلىققا قۇمار بالالار.
ونى ىزدەۋگە كومەكتەسكەندەرى ءۇشىن دە كوپ راحمەت. تاۋلىگىنە 1،5 ساعات قانا ۇيىقتاپ، ءسۇرىنىپ-جىعىلعانشا ىزدەدى.
ءومىر وسىمەن توقتاپ قالمايدى. ول ارى قاراي دا جالعاسا بەرەدى. وتباسىم مەنى ەشنارسە دە سىندىرا المايتىنىن ءتۇسىنۋى ءتيىس. راس، ءومىرىمنىڭ ءمانى كەتكەندەي كۇيدە تۇرمىن. كۇنى كەشە اتاقتى ەلتون دجوننىڭ ارىپتەستەرىمەن بىرگە ءان جازىپ جاتقان بولاتىنبىز. ءقازىر سونىڭ بارلىعى قاجەتسىز بولىپ قالعانداي.
مەنىڭ باسىمداعى جاعداي سىزدەرگە ساباق بولۋى ءتيىس. ومىردە ماحابباتتان وزگەسىنىڭ ءبارى بەكەر.
وسىنى تۇسىنىڭىزدەر. قىزعانىشقا جول بەرمەڭىزدەر. بىرەۋگە دەگەن قىزعانىشىڭىز وزىڭىزگە دەگەن سىي-قۇرمەتسىزدىگىڭىز.
جۋىردا ءدىن وكىلدەرىنەن سافارعا دۇعا وقۋلارىن سۇراعان ەدىم. ول تابىلماسا دا، قوعام تازالىقتىڭ نە ەكەنىن ءتۇسىنسىنشى دەگەن وي تۇردى. مەنىڭ ءدال وسىلاي ايتۋعا قۇقىعىم بار. ويتكەنى بۇگىن مەن ومىرىمدە ەڭ ۇلكەن ساباق الدىم، سوققى الدىم”.
كومپوزيتور ومىرىندە بالالارىنىڭ ولىمىنە كۋا بولۋدان قورىققان ەكەن. جۇبايى ەكەۋى وسى كۇنگە دەيىن ءتورت بالا تاربيەلەگەن.
