تۇركيا پرەزيدەنتى رەجەپ تايىپ ەردوعاننىڭ باستى قارسىلاسى فەتحۋللاح گۇلەن ومىردەن ءوتتى، - دەپ حابارلايدى Dalanews.kz.
تۇركيادا تەرروريستىك دەپ جاريالانعان FETO ۇيىمىنىڭ نەگىزىن قالاۋشى فەتحۋللاح گۇلەن اقش-تا كوز جۇمدى. بۇل اقپاراتتى ونىڭ جيەنى ەبۋسسەمە گۇلەن راستادى.
فەتحۋللاح گۇلەن اقش-تا 1999 جىلدان بەرى تۇرادى. ول 84 جاسىندا 20 قازاندا پەنسيلۆانياداعى كلينيكادا جان تاپسىردى.
ايتا كەتەيىك، 2016 جىلدىڭ 16 شىلدەسىندە تۇركيادا «اسكەري توڭكەرىس» بولعان ەدى. «اسكەري توڭكەرىس» بولعان ساتتەن بىرەر مينۋت وتكەن سوڭ، ەل پرەزيدەنتى رەجەپ تايىپ ەردوعان «توڭكەرىستى گۇلەن ۇيىمداستىردى» دەپ مالىمدەمە جاساپ ۇلگەرگەن ەدى.
توڭكەرىستەن كەيىن اينالدىرعان 4-5 كۇننىڭ ىشىندە جۇزدەگەن مىڭ ادامدى جۇمىستان شىعارىپ، تۇتقىنداۋ وپەراسياسى باستالعان بولاتىن. الايدا، گۇلەن تاعىلعان ايىپتى «جالا» دەپ تاۋىپ، حالىقارالىق كوميسسيا قۇرۋعا شاقىرعان ەدى. اراعا 8 ايعا جۋىق ۋاقىت سالىپ، گەرمانيا، امەريكا، انگليا مەملەكەتتەرى «اسكەري توڭكەرىسكە» بايلانىستى بىرىنەن سوڭ ءبىرى مالىمدەمە جاساپ، ارنايى پىكىر ءبىلدىردى. نەمىس قاۋىپسىزدىك قىزمەتى (BND) باسشىسى برۋنو كاحل توڭكەرىس ارەكەتىنىڭ ارتىندا گۇلەن تۇر دەگەنگە دالەل جوقتىعىن ايتقان.
«Der Spiegel» http://www.spiegel.de/international/germany/german-intelligence-chief-bruno-kahl-interview-a-1139602.html جۋرنالىنا سۇحبات بەرگەن كاحل 15 شىلدەدەگى توڭكەرىس جاساۋعا ارەكەتتىڭ تۇركيادا مەملەكەتتىك قىزمەتكەرلەردى جۇمىستان قۋىپ، قارسىلاستاردى تۇرمەگە تىققان «تازالاۋ تولقىنى» ءۇشىن «ءبىر سىلتاۋ» رەتىندە قولدانىلعانىن ايتىپ، «توڭكەرىس راسىندا جۇزەگە اسقان كۇننىڭ وزىندە ءقازىر كورگەندەرىمىزدى كورەر ەدىك، مۇمكىن ءدال وسىنداي تەرەڭدىك پەن راديكالدى كەيىپتە بولماس ەدى» دەدى.
توڭكەرىس ارەكەتىنىڭ ارتىندا فەتحۋللاھ گۇلەن تۇرعاندىعى جايلى دالەل تابا الماعاندارىن ايتقان كاحل “تۇركيا كوپ جاعىنان ءبىزدى وسىعان كوندىرۋگە تىرىستى، الايدا دەگەندەرىنە ءالى جەتە قويمادى” دەدى.
BND باسشىسى بۇدان بولەك گۇلەن جاماعاتىن تۇركيانىڭ راديكال يسلامشىل نە تەررورلىق ۇيىمعا جاتقىزۋىمەن كەلىسپەيتىنىن، قوزعالىستى «زايىرلى ءبىلىم بەرۋ ءۇشىن ەڭبەك ەتىپ جاتقان ازاماتتىق قوعام» رەتىندە سيپاتتاعان.
