الاتاۋ اۋدانىن ارالاۋ بارىسىندا الماتى قالاسى اكىمى ەربولات دوسايەۆ قاراسۋ شاعىن اۋدانىنداعى باعانالى وردا كوشەسىندەگى سكۆەردى اباتتاندىرۋ بارىسىمەن تانىستى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
جوبا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلدى. شىلدە ايىندا باستالعان ۇزىندىعى 800 مەتر بولاتىن جاڭا جاياۋ جۇرگىنشىلەر ايماعى مويىلدى جانە قالامبايەۆ كوشەلەرىنىڭ ارالىعىندا ورنالاسقان.
جوبا كەلەسى ايدا اياقتالادى دەپ جوسپارلانۋدا. بۇل وتكەن جىلى شاياحمەتوۆ پەن مويىلدى كوشەلەرى اراسىندا جوندەلگەن 400 مەترلىك جولاقتىڭ جالعاسى بولدى. وسىلايشا، ۇزىندىعى 1200 مەتر بولاتىن ءبىرتۇتاس سەرۋەندەۋ ايماعى قۇرىلدى.
جوبانى جۇزەگە اسىرۋ ءۇشىن تىكەنەك پەن ءشوپ باسقان اۋماق تازارتىلىپ، تەگىستەلىپ، اسفالت جانە تاس توسەلدى. جالپى اۋدانى 55،4 مىڭ شارشى مەترگە كوگالداندىرۋ جۇمىستارى جۇرگىزىلىپ، 950 مەترلىك اۆتوسۋارۋ جۇيەسى ورناتىلدى. تۇرعىنداردىڭ جايلىلىعى ءۇشىن 150 شام، ورىندىقتار جانە قوقىس جاشىكتەرى قويىلدى. جاڭارتىلعان اۋماقتىڭ جالپى اۋدانى 6،5 گەكتار.
اتقارىلعان جۇمىستارمەن تانىسقان سوڭ الماتى اكىمى جوبانى ۋاقىتىلى اياقتاۋدى جانە ءىرى اعاشتار وتىرعىزۋدى تاپسىردى. ول سونداي-اق قوعامدىق كەڭىستىكتى دامىتۋداعى تۇرعىنداردىڭ ۇلەسىن ەرەكشە اتادى.
– سىزدەردىڭ بەلسەندى ۇستانىمدارىڭىز اۋدان مەن قالا اكىمدىگىنە كورىكتەندىرۋگە جانە جايلى جاسىل ايماقتار قۇرۋعا قاراجات بولۋگە كومەكتەسەدى. «حالىق قاتىساتىن بيۋدجەت» باعدارلاماسىنا قاتىسىپ، جوبالارىڭىزدى ۇسىنىپ، سۇيىكتى قالامىزدىڭ وركەندەۋىنە ۇلكەن ۇلەس قوسىپ كەلەسىزدەر، – دەپ ەربولات دوسايەۆ قالا تۇرعىندارىن جاڭارتىلعان اۋماقتاردا ءتارتىپ ساقتاۋعا جانە بالالاردا قالالىق كەڭىستىككە دەگەن قۇرمەت پەن ۇقىپتىلىق سەزىمىن تاربيەلەۋگە شاقىردى.
تۇرعىندار وزگەرگەن كەڭىستىك ءۇشىن قالا اكىمىنە العىس ءبىلدىردى.
– ەندى ءبىز وتباسىمىزبەن وسى جەردە سەرۋەندەيمىز، دوستارىمىزبەن كەزدەسىپ، ۋاقىتىمىزدى ءتيىمدى وتكىزەمىز. جاڭا الاڭنىڭ ارقاسىندا جاقسى دەمالىس ءۇشىن ورىن كوبەيدى. بيلىك تۇرعىنداردىڭ ءوتىنىشىن ەستىپ، ولاردى جۇزەگە اسىرىپ جاتقانىنا قۋانىشتىمىز، – دەدى تۇرعىندار.
