بۇل تۋرالى 2024 جىلى 31 قازاندا قازاقستاندا ءوتىپ جاتقان شەتەلدىك ينۆەستورلار كەڭەسىنە قاتىسىپ، مەملەكەت باسشىسى قاسىم-جومارت توقايەۆپەن كەزدەسكەن ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو مالىمدەدى، دەپ حابارلايدى Dalanews.kz.
مەملەكەت باسشىسىمەن كەزدەسۋى بارىسىندا ەقدب پرەزيدەنتى ەلىمىزدىڭ ورنىقتى دامۋىنا، ينۆەستيسيالىق احۋالىنىڭ جاقسارۋىنا جانە ەكونوميكالىق جاڭعىرۋىنا اسەر ەتەتىن ءوزارا ىقپالداستىقتىڭ الەۋەتتى باعىتتارىنا قاتىستى جوسپارىمەن ءبولىستى. وديل رەنو-باسسو بانك قازاقستاننىڭ ينۆەستيسيالىق جوبالارىن مۇقيات زەردەلەيتىنىن جەتكىزىپ، ينفراقۇرىلىمدىق دامۋدى الداعى ۋاقىتتا دا قولداۋعا نيەتتى ەكەنىن مالىمدەدى.
"ەقدب تاياۋ جىلدارى "جاسىل ەكونوميكا" تالاپتارىن ورىنداۋ اياسىندا قازاقستانعا 2 ميلليارد ەۆرو قۇيۋدى جوسپارلاپ وتىر. سونداي-اق بيىل ەۋروپالىق قايتا قۇرۋ جانە دامۋ بانكى قازاقستانداعى 22 جوبانى جۇزەگە اسىرۋعا 650 ميلليون دوللار بولەدى"، - دەدى وديل رەنو-باسسو.
ەقدب پرەزيدەنتى "سامۇرىق-قازىنا" اكسيونەرلىك قوعامىنىڭ ساتىپ الۋ ۇدەرىسىنە وڭ باعا بەردى. ونىڭ ايتۋىنشا، كرەديتور-كومپانيالاردىڭ قور ەرەجەسىنە سايكەس جۇمىس ىستەۋى اتالعان ساتىپ الۋ ۇدەرىسىنىڭ اشىقتىعىنا سەنىم جوعارى ەكەنىن كورسەتەدى.
بۇعان دەيىن ەۋروپالىق قايتا قۇرۋ جانە دامۋ بانكىنىڭ (ەقدب) پرەزيدەنتى وديل رەنو-باسسونىڭ قازاقستانعا جۇمىس ساپارى 2024 جىلدىڭ 31 قازاننان 1 قاراشا ارالىعىنا جوسپارلانعانىن جازعان بولاتىنبىز.
