ەۋرووداق 2025 جىلى اقپاندا رەسەيلىك اسكەردىڭ ۋكرايناعا باسىپ كىرۋىنە 3 جىل تولۋىنا وراي رەسەي قارسى سانكسيالاردىڭ 16-پاكەتىن ەنگىزگەلى جاتىر. ولار بۇعان دەيىن تيمەگەن نەمەسە قاجەتتى دەڭگەيدە قوزعالماعان ەكونوميكالىق سەكتورلارعا، سونداي-اق «رەسەيلىك پروپاگاندا رەجيمىن قولدايتىن جانە ۋكراينانىڭ اۋماقتىق تۇتاستىعىنىڭ بۇزىلۋىنا جاۋاپتى» ادامدار مەن ۇيىمدارعا قارسى باعىتتالماق، دەپ جازادى Dalanews.kz.
بۇل تۋرالى نەمىستىڭ DW باسىلىمى Welt am Sonntag-قا سىلتەمە جاساپ، حابارلايدى.
ەۋرووداق بۇل سانكسيالار پاكەتىن ازىرلەۋگە وتكەن جۇمادا كىرىسىپ كەتىپتى. ناقتىراق ايتقاندا، ەۋروكوميسسيا مەن ەۋروپالىق قىزمەت رەسەي ءۇشىن تىڭشىلىق ەتكەن، جالعان اقپاراتتى تاراتۋ بويىنشا جۇمىس ىستەگەن تۇلعالاردىڭ اكتيۆتەرىن بۇعاتتاپ، ەۋروپاعا كىرۋگە تىيىم سالماق.
بۇعان دەيىن 16 جەلتوقساندا ەۋرووداق رەسەيگە قارسى 15ء-شى سانكسيالار پاكەتىن بەكىتكەن. ول، نەگىزىنەن، رەسەيدىڭ اسكەري ونەركاسىبىنە باعىتتالعان. ونىڭ اياسىندا جۇڭگو، ءۇندىستان، يران، سەربيا جانە باا-دەگى 32 ۇيىمعا جانە 54 تۇلعانىڭ اكتيۆتەرىنە شەكتەۋ قويىلدى. ونىڭ ىشىندە سولتۇستىك كورەيانىڭ ەكى شەندىسى دە بار. سونداي-اق، شەكتەۋلەر باسقا ەلدەردىڭ 52 تانكەرىن دە قامتىپ وتىر، ەندى ولارعا پورتتارعا كىرۋگە تىيىم سالىنادى، تەڭىز تاسىمالىمەن بايلانىستى قىزمەتتەردىڭ كەڭ سپەكترىنەن قاعىلاتىن بولادى. ەۋرووداق ولار ماسكەۋگە سانكسيانى اينالىپ وتكىزۋگە كومەكتەسىپ جاتىر دەپ ەسەپتەيدى.
