ەنەرگەتيكا ءمينيسترى ەرلان اقكەنجەنوۆ قازاقستاننىڭ وپەك+ كەلىسىمىن ۇستاناتىنىن راستادى، دەپ حابارلايدى Dalanews.kz.
"قازاقستاننىڭ ەنەرگەتيكا ءمينيسترى ەرلان اقكەنجەنوۆ استانادا وپەك باس حاتشىسى مارتەبەلى حايتام ال-گايسپەن كەزدەستى. كەزدەسۋ بارىسىندا مينيستر قازاقستاننىڭ تاريحي وپەك+ كەلىسىمىنە وڭ كوزقاراسىن جەتكىزىپ، جاھاندىق مۇناي نارىعىنداعى تۇراقتىلىقتى قامتاماسىز ەتۋ جونىندەگى بىرلەسكەن ىنتىماقتاستىقتى جالعاستىرۋعا دايىن ەكەنىن ءبىلدىردى"، دەلىنگەن ەنەرگەرتيكا مينيسترلىگى باسپا ءسوز قىزمەتىنىڭ حابارلاماسىندا.
تاراپتار ىنتىماقتاستىق ناتيجەلەرى مەن "8 ەل" كەزدەسۋى اياسىندا قول جەتكىزىلگەن ۋاعدالاستىقتاردى جوعارى باعالادى.
"قازاقستان وپەك جانە كەلىسىمگە قاتىسۋشى مەملەكەتتەرمەن ودان ءارى تىعىز ىنتىماقتاستىققا دايىن ەكەنىن ءبىلدىرىپ، وندىرۋشىلەردىڭ، تۇتىنۋشىلاردىڭ جانە جاھاندىق ەكونوميكانىڭ مۇددەسى ءۇشىن الەمدىك نارىقتاعى تۇراقتىلىقتى نىعايتۋعا ىنتالى ەكەندىگىن جەتكىزدى"، دەپ ناقتىلايدى مينيسترلىك.
ايتا كەتسەك، بۇعان دەيىن ەنەرگەتيكا مينيسترلىگى ءساۋىر ايىندا قازاقستان وپەك+ بەلگىلەگەن كۆوتادان تاۋىلىگىنە 297 مىڭ باررەل اسىپ كەتكەنىن حابارلانعان بولاتىن.
