ءماجىلىس ەكىنشى وقىلىمدا سيفرلىق ورتاداعى قۇقىقتىق قاتىناستاردى رەتتەيتىن سيفرلىق كودەكس جوباسىن قابىلدادى. قۇجات ازاماتتاردىڭ جەكە دەرەكتەرىن قورعاۋدى كۇشەيتۋدى جانە سيفرلىق ينفراقۇرىلىمدى دامىتۋعا باعىتتالعان، دەپ حابارلايدى Dalanews.kz.

جاڭا كودەكس قابىلدانسا، قازاقستاندىقتار:

• وزدەرىنىڭ جەكە دەرەكتەرىن مەملەكەتتىك جۇيەلەردەن ءوشىرۋدى نەمەسە جاسىرىن ەتۋدى تالاپ ەتە الادى؛

• دەرەكتەرىنىڭ قالاي جانە قايدا قولدانىلاتىنىن باقىلاۋعا مۇمكىندىك الادى؛

• الگوريتمدەر مەن جاساندى ينتەللەكتتىڭ جۇمىسى تۋرالى اشىق اقپارات الا الادى.

سونىمەن قاتار قۇجات مەملەكەتتىك قىزمەتتەردىڭ بارشا ازاماتقا، ونىڭ ىشىندە مۇمكىندىگى شەكتەۋلى ادامدارعا قولجەتىمدى بولۋىن قامتاماسىز ەتۋدى كوزدەيدى.

سيفرلىق كودەكس سيفرلىق ەكونوميكانىڭ دامۋىنا نەگىز بولماق. وندا ەلەكتروندى قولتاڭبا، سمارت-كەلىسىمشارتتار، دەرەكتەردى الماسۋ ءتارتىبى جانە الاياقتىقتان قورعانۋ سياقتى تەتىكتەر زاڭ جۇزىندە بەكىتىلەدى. العاش رەت “ۇلتتىق” جانە “سەنىمدى” سيفرلىق وبەكتىلەر ۇعىمدارى ەنگىزىلىپ، سيفرلىق ينفراقۇرىلىم كيبەرقاۋىپسىزدىك اۋديتىنەن وتەتىن بولادى.

سيفرلىق كودەكستىڭ باستى ماقساتتارى:

• ادام مۇددەسىنىڭ باسىمدىعى؛

• جەكە تۇلعا، قوعام جانە مەملەكەتتىڭ قاۋىپسىزدىگىن قامتاماسىز ەتۋ؛

• سيفرلىق دەرەكتەردى جاساۋ، ساقتاۋ جانە تاراتۋ ەركىندىگى؛

• جەكە جانە قوعامدىق مۇددەلەر اراسىنداعى تەپە-تەڭدىكتى ساقتاۋ.