TikTok پلاتفورماسى “وتباسىلىق پارامەترلەر” بولىمىندە جاڭا قۇرالداردى ىسكە قوستى، دەپ حابارلايدى Dalanews.kz.
ەندى اتا-انالار بالالاردىڭ TikTok-تى پايدالاناتىن ۋاقىتىن بەلگىلەنگەن مەرزىمگە، اسىرەسە تۇنگى ۋاقىتتا شەكتەۋگە مۇمكىندىك الادى.
“پلاتفورما جاستار ءۇشىن ءقاۋىپسىز سيفرلىق ورتا قالىپتاستىرۋعا جانە اتا-انالارعا بالالارىنىڭ قوسىمشاداعى بەلسەندىلىگىن باقىلاۋعا كومەكتەسۋگە باعىتتالعان جاڭا فۋنكسيالاردى ىسكە قوساتىنىن مالىمدەدى. اتاپ ايتقاندا، TikTok “وتباسىلىق پارامەترلەر” بولىمىندە اتا-انالارعا بالالاردىڭ TikTok-قا كىرۋ ۋاقىتىن بەلگىلەنگەن مەرزىمدە شەكتەۋگە مۇمكىندىك بەرەتىن جاڭا قىزمەتتى ۇسىندى”، – دەلىنگەن مادەنيەت جانە اقپارات مينيسترلىگىنىڭ باسپا ءسوز قىزمەتى تاراتقان حابارلامادا.
ەندى اتا-انالار TikTok-قا كىرۋ ۋاقىتىن شەكتەپ قانا قويماي، بالالاردىڭ كىمگە جازىلعانىن جانە قانداي اككاۋنتتاردى بۇعاتتاعانىن دا باقىلاي الادى.
جاڭا مۇمكىندىكتەر:
“بەلسەندى ەمەس ۋاقىت”– TikTok-قا قولجەتىمدىلىكتى بەلگىلى ءبىر ۋاقىتقا، مىسالى، وقۋ نەمەسە ۇيقى كەزىندە بۇعاتتاۋ؛
قايتالاناتىن كەستە – تۇراقتى تۇردە سيفرلىق ءۇزىلىس جاساۋعا ارنالعان كەستەنى ورناتۋ؛
شەكتەۋدى وزگەرتۋ – بالا سۇرانىس جىبەرگەن جاعدايدا، بۇرىن بۇعاتتالعان ۋاقىتقا رۇقسات بەرۋ مۇمكىندىگى.
الداعى ايلاردا TikTok-تا جاسوسپىرىمدەر اتا-انالارىنا پلاتفورمانىڭ ەرەجەلەرىن بۇزۋى مۇمكىن كونتەنت تۋرالى حابارلاي الاتىن جاڭا فۋنكسيا ىسكە قوسىلادى. بۇل مۇمكىندىك اتا-انا باقىلاۋى قوسىلماعان جاعدايدا دا قولجەتىمدى بولماق.
