ەندى مال ەسەبىن جۇرگىزبەسەڭىز، ەكە ەسە ايىپپۇل ارقالاۋىڭىز مۇمكىن. بۇل تۋرالى اۋىل شارۋاشىلىعى ءمينيسترى ايداربەك ساپاروۆ مالىمدەدى، - دەپ حابارلايدى Dalanews.kz.
ءسىبىر جاراسىن جۇقتىرۋ جاعدايلارىنا بايلانىستى مال شارۋاشىلىعى سالاسىندا باقىلاۋ شارالارى كۇشەيتىلمەك. اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا، ىندەتتىڭ تارالۋىنا مالدىڭ تىركەلمەگەنى مەن دەر كەزىندە ۆاكسيناسيا جاسالماعانى سەبەپ بولعان.
"بۇل سالاداعى ءتارتىپتى قاتاڭداتۋىمىز قاجەت. مال يەلەرى ءوز جاۋاپكەرشىلىگىن تۇسىنۋگە ءتيىس، بەيبەرەكەت مال وسىرۋگە جول بەرىلمەيدى. مىسالى سيىر بۇزاۋلاسا، 7 كۇن ىشىندە بۇزاۋ ەسەپكە الىنىپ، قۇلاعىنا ارنايى بەلگى تاعىلۋى كەرەك. بىزدە اۆتوماتتاندىرىلعان جۇيە بار، ءبىراق كەيبىر ازاماتتار بۇل تالاپتاردى ەلەمەيدى. جەرگىلىكتى اكىمدىكتەر مەن جاۋاپتى ورگاندارعا تاپسىرما بەرىلدى، ءار ۇيگە بارىپ، حالىققا تالاپتاردى ءتۇسىندىرۋ قاجەت"، – دەدى ساپاروۆ ۇكىمەتتەگى بريفينگتە.
ءمينيستردىڭ ايتۋىنشا، تەك مال يەلەرى ەمەس، سونىمەن قاتار، وزدەرىنە سەنىپ تاپسىرىلعان اۋماققا باقىلاۋ جۇرگىزبەگەن ۆەتەرينارلار دا، ۆەتەرينارلىق قۇجاتسىز مال ساتقان ساتۋشىلار دا جاۋاپقا تارتىلادى.
"ءقازىر تىركەلمەگەن مال ءۇشىن سالىناتىن ايىپپۇل كولەمى – 30 مىڭ تەڭگە. ال بازارلاردا قۇجاتسىز، انىقتاماسىز مال ساتىپ جۇرگەندەر بار. ولارعا قاتىستى ءتىپتى قىلمىستىق جاۋاپكەرشىلىك ەنگىزۋ ماسەلەسى قارالىپ جاتىر"، – دەپ تولىقتىردى مينيستر.
بۇگىندە زاڭعا ءتيىستى وزگەرىستەر ازىرلەنىپ جاتىر، ولاردى ماجىلىسكە دەپۋتاتتار دەمالىستان ورالعان سوڭ، كۇزدە ەنگىزۋ جوسپارلانىپ وتىر.
