Endi mal esebin júrgizbeseńiz, eke ese aiyppul arqalaýyńyz múmkin. Bul týraly aýyl sharýashylyǵy ministri Aidarbek Saparov málimdedi, - dep habarlaidy Dalanews.kz.
Sibir jarasyn juqtyrý jaǵdailaryna bailanysty mal sharýashylyǵy salasynda baqylaý sharalary kúsheitilmek. Aýyl sharýashylyǵy ministri Aidarbek Saparovtyń aitýynsha, indettiń taralýyna maldyń tirkelmegeni men der kezinde vaktsinatsiia jasalmaǵany sebep bolǵan.
"Bul saladaǵy tártipti qatańdatýymyz qajet. Mal ieleri óz jaýapkershiligin túsinýge tiis, beibereket mal ósirýge jol berilmeidi. Mysaly siyr buzaýlasa, 7 kún ishinde buzaý esepke alynyp, qulaǵyna arnaiy belgi taǵylýy kerek. Bizde avtomattandyrylǵan júie bar, biraq keibir azamattar bul talaptardy elemeidi. Jergilikti ákimdikter men jaýapty organdarǵa tapsyrma berildi, ár úige baryp, halyqqa talaptardy túsindirý qajet", – dedi Saparov Úkimettegi brifingte.
Ministrdiń aitýynsha, tek mal ieleri emes, sonymen qatar, ózderine senip tapsyrylǵan aýmaqqa baqylaý júrgizbegen veterinarlar da, veterinarlyq qujatsyz mal satqan satýshylar da jaýapqa tartylady.
"Qazir tirkelmegen mal úshin salynatyn aiyppul kólemi – 30 myń teńge. Al bazarlarda qujatsyz, anyqtamasyz mal satyp júrgender bar. Olarǵa qatysty tipti qylmystyq jaýapkershilik engizý máselesi qaralyp jatyr", – dep tolyqtyrdy ministr.
Búginde zańǵa tiisti ózgerister ázirlenip jatyr, olardy Májiliske depýtattar demalystan oralǵan soń, kúzde engizý josparlanyp otyr.
