استانادا قىز بالالاردى تەحنولوگيا سالاسىنا تارتۋعا باعىتتالعان RoboTechnoGirls 2025 ءبىلىم بەرۋ جوباسى ىسكە قوسىلدى،- دەپ حابارلايدى Dalanews.kz
جوبا قىز بالالارعا قازىرگى زامانعى ينجەنەرلىك جانە تەحنولوگيالىق بىلىمگە تەڭ قولجەتىمدىلىكتى قامتاماسىز ەتۋگە، سونداي-اق ولاردىڭ عىلىم، تەحنولوگيا، ينجەنەريا جانە ماتەماتيكا سالالارىنا (STEM) دەگەن تۇراقتى قىزىعۋشىلىعىن قالىپتاستىرۋعا جانە تەحنيكالىق ماماندىقتارداعى گەندەرلىك كەدەرگىلەردى جەڭۋگە جاردەمدەسۋگە باعىتتالعان.
كۋرستاردى «روبوتەك» روبوتوتەحنيكا مەكتەبى ۇيىمداستىرىپ وتىر. جوباعا TechnoWomen كوممەرسيالىق ەمەس ۇيىمى مەن «استانا دارىنى» دارىندى بالالاردى انىقتاۋ جانە قولداۋ ورتالىعى قولداۋ كورسەتۋدە.
جوبانىڭ سالتاناتتى اشىلۋىنا «استانا دارىنى» ورتالىعىنىڭ باسشىسى جانار بەيسەنبايەۆا، TechnoWomen قاۋىمداستىعىنىڭ پرەزيدەنتى جانە تەڭ قۇرىلتايشىسى ءازيزا شوجەيەۆا، «روبوتەك» مەكتەبىنىڭ باس ديرەكتورى ءارى نەگىزىن قالاۋشى سانجار شالقاربەكوۆ، سونداي-اق مەكتەپتىڭ وپەراسيالىق ديرەكتورى ديانا دۇيسەنوۆا قاتىستى.
«بۇل جوبا داستۇرگە اينالىپ ۇلگەردى جانە بيىل قاتارىنان ەكىنشى رەت وتكىزىلۋدە. وتكەن جىلى ءبىز 100 قىزدى ءساتتى وقىتىپ شىعاردىق. بيىل دا شامامەن 100 قاتىسۋشى كۋرسقا قاتىسۋعا نيەت ءبىلدىردى. قىزدار روبوتوتەحنيكا مەن جاساندى ينتەللەكت پاندەرىنەن ساباق وقيدى. جوبا اياسىندا ءتۇرلى شارالار جوسپارلانعان: حاكاتون، رەسپۋبليكالىق جانە قالالىق وليمپيادالار، جاساندى ينتەللەكت قولدانۋعا ارنالعان بايقاۋلار ۇيىمداستىرىلادى. بۇل – تەحنولوگيا سالاسىنداعى باستى ترەندتەردىڭ ءبىرى. بۇل – قىز بالالاردىڭ تەحنولوگياعا دەگەن قىزىعۋشىلىعىن ارتتىرىپ، ولاردى ءارى قاراي دامۋعا شابىتتاندىراتىن جىل سايىنعى داستۇرگە اينالعان جوبا، – دەدى جانار بەيسەنبايەۆا.
باعدارلاما 10-15 جاس ارالىعىنداعى قاتىسۋشىلارعا ارنالعان جانە استاناداعى ەكى وقۋ ورنىندا وفلاين فورماتتا وتكىزىلەدى. ساباقتار قازاق جانە ورىس تىلدەرىندە جۇرگىزىلەدى.
قىز بالالار 6 اپتا بويى – 17 تامىزعا دەيىن – روبوتوتەحنيكا مەن جاساندى ينتەللەكت نەگىزدەرىن، كونسترۋكتورلارمەن، سەنسورلارمەن جانە قاراپايىم الگوريتمدەرمەن جۇمىس ىستەۋدى ۇيرەنەدى. باعدارلامادا جەكە دە، كوماندالىق تاپسىرمالار دا قاراستىرىلعان. كۋرس سوڭىندا قاتىسۋشىلار وزدەرىنىڭ تەحنيكالىق جوبالارىن تانىستىرادى.
نەگىزگى ساباقتاردان بولەك، مازمۇندى قوسىمشا باعدارلاما ۇسىنىلعان:
• ەلدەگى ستارتاپتار مەن سيفرلىق شەشىمدەردىڭ ەڭ ءىرى تەحنوپاركى Astana Hub-قا ەكسكۋرسيا؛
• STEM سالاسىنداعى ايەل ماماندارمەن موتيۆاسيالىق كەزدەسۋلەر (TechnoWomen قاۋىمداستىعىنىڭ قولداۋىمەن)؛
• شىعارماشىلىق پەن لوگيكالىق ويلاۋدى دامىتۋعا باعىتتالعان ينجەنەرلىك ۆوركشوپتار مەن ويىندار.
«جوباعا قىزىم - ايىم قاتىسىپ جاتىر. ءبىز بۇل روبوتوتەحنيكا باعدارلاماسىنا قىزىعۋشىلىقپەن قوسىلدىق. ول تۋرالى سىنىپ جەتەكشىسىنەن ەستىپ، بىردەن قاتىسقىمىز كەلدى. بۇگىن ونىڭ العاشقى ساباعى. ءبىز ونىڭ قانداي اسەر الىپ، قانداي ءبىلىم جينايتىنىن اسىعا كۇتىپ وتىرمىز. بالالار ەرتە جاستان تەحنولوگيا مەن باعدارلامالاۋمەن تانىسىپ جاتقانى – وتە ماڭىزدى. بۇل – بۇگىنگى زامان تالابى. وسىنداي تاماشا مۇمكىندىك ءۇشىن ۇيىمداستىرۋشىلارعا ۇلكەن راقمەت! اسىرەسە، جوبانىڭ تەگىن ەكەنىنە ريزامىز. بۇل – بالالاردىڭ سيفرلىق تەحنولوگيالار الەمىنە باستار جولى، – دەدى №102 مەكتەپتىڭ 4-سىنىپ وقۋشىسى ايىمنىڭ اناسى الۋا پەرنييەۆا.
كۋرس سوڭىندا بارلىق قاتىسۋشى العان بىلىمدەرى مەن داعدىلارىن راستايتىن سەرتيفيكاتتارعا يە بولادى.
