ەلىمىزدە مۇعالىمدەرگە ۆاكسينا سالدىرۋ 1 ناۋرىزدا باستالدى. بۇگىن ەلورداداعى №78 مەكتەپ-گيمنازياسىنىڭ مۇعالىمدەرى ەرىكتى تۇردە ۆاكسينا سالدىردى.
– ۆاكسينا حالىقتى ءقاۋىپتى ىندەتتەن ساقتايدى. ءبىز اۋرۋدىڭ الدىن الۋ ءۇشىن ەگىلەتىن ۆاكسينا بارىنا قۋانامىز. اقپان ايىندا مەديسينا قىزمەتكەرلەرىنە ۆاكسينا سالىندى. بۇگىن كەزەكتى تۇردە مەكتەپ مۇعالىمدەرىنە سالۋدامىز. بۇل ۆاكسينانى ءقازىر سالامىز جانە 21 كۇننەن سوڭ ەكىنشى مارتە قايتالايمىز. ەڭ الدىمەن سالۋدىڭ الدىندا قابىلداۋشىدان ساۋالناما الىپ، مەديسينالىق قاراۋدان وتكىزەمىز. سونداي-اق اسقىنۋ مەن قارسى كورسەتكىشتەردى ءتۇسىندىرىپ وتەمىز، – دەدى «سالاۋاتتى استانا» ەمحاناسىنىڭ دارىگەرى مايكامال ەسەلبايەۆا.
دارىگەردىڭ ايتۋىنشا، بۇگىن ەرىكتى تۇردە 30 شاقتى ءمۇعالىم ۆاكسينا سالدىردى. قابىلداعاندار وزدەرىن جاقسى سەزىنۋدە. ەشقانداي كەرى اسەرى بايقالماعان.
– كوروناۆيرۋس – الەمدى الاڭداتىپ وتىرعان دەرتتىڭ ءبىرى. نۇر-سۇلتان قالاسىنداعى مەكتەپتەر اراسىندا كوروناۆيرۋسقا قارسى ەكپە جۇمىستارى ءجۇرىپ جاتقانىن ءبىلىپ، ءوز ەركىممەن سالدىردىم. ۆاكسينا العان سوڭ ءوزىمدى جاقسى سەزىنىپ تۇرمىن. ەشقانداي وزگەرىس بايقاعان جوقپىن. مەكتەپ ۇستازدارى وقۋشىلاردىڭ دەنساۋلىعىن ويلاپ، قاۋىپسىزدىك ماقساتىندا ۆاكسينا سالدىرعان دۇرىس دەپ ويلايمىن، – دەيدى №78 مەكتەپ ءمۇعالىمى گۇليزا سارسەمبايەۆا.
