جانار بايمۇحامبەتوۆا التىن قۇرساقتى انا. 9 بالانى دۇنيەگە اكەلگەن ول ءقازىر وسى ورتالىقتاعى تىگىن سەحىندا ەڭبەك ەتەدى. «تاپقان تابىسىم بالا-شاعامدى اسىراۋعا جەتكىلىكتى» دەيدى كوپ بالالى انا. بۇرىندارى جۇمىسسىز جۇرگەن جاناردى ءوزى سەكىلدى انالار وسىندا شاقىرعان. ءقازىر «ەكى قولعا ءبىر كۇرەك» ۇستاعان ول، قىز جاساۋى مەن ءتۇرلى بۇيىمدار تىگۋدى مەڭگەرىپ الىپتى.
– ەشقانداي جۇمىستان قاشپايمىز. قانداي جۇمىس بولسا، سونى ىستەۋگە تىرىسامىز. بۇل جەردىڭ بىزدەرگە بەرەرى كوپ. ويتكەنى بۇل جەردە التىن قۇرساقتى انالارىمىز باس قوسادى. بىر-بىرىمىزگە كومەكتەسەمىز. سوزبەن بولسا دا، ىسپەن بولسا دا كومەك-قولداۋىمىزدى ايامايمىز. بۇگىندە باستى ماقساتىمىز قولىمىزدان كەلەتىن قازاق قول ونەرىن دامىتۋ جانە وتاندىق ءونىمدى وركەندەتۋ، – دەيدى جانار بايمۇحامبەتوۆا.
الەۋمەتتىك وسال توپتارمەن جۇمىس ىستەيتىن بۇل ورتالىقتا وننان اسا انا جۇمىس ىستەيدى. ولاردىڭ ءار قايسىسىنا جۇكتەلگەن ءوز مىندەتى بار. ءبىرى تىگىن تىكسە، ەندى ءبىرى دايىن ءونىمدى وتكىزۋمەن اينالىسادى. ءقازىر كوپ بالالى انالاردىڭ قولىنان شىققان زاتتارعا سۇرانىستا بار.
– 9-10 بالاسى بار انالاردىڭ ءبىرازى وسىندا جۇمىس ىستەيدى. تىگىن تىگۋدى بىلمەي كەلگەن ءبىراز اناعا تىگىن تىگۋدى ۇيرەتتىپ جاتىرمىز. كوشەگە شىعىپ، ۇكىمەتكە قول جايىپ جۇرگەنشە ءوز ءناپاقامىزدى تابايىق دەپ شەشىم قابىلدادىق. ءبىر جىل بۇرىن اشىلدىق. اقىرىنداپ جۇمىس باستادىق. ناتيجەسى جامان ەمەس، – دەيدى ورتالىق جەتەكشىسى اليدا وتاربايەۆا
ال التىن قۇرساقتى انالار جۇمىستا بولعان كەزدە ولاردىڭ ۇل-قىزدارى ۇيدە ءبىلىم مەن تاربيەدەن الىستاماس ءۇشىن ارنايى ءبىلىم بەرۋ ورتالىعى دا اشىلعان. ءقازىر مۇندا 90 نان استام بالا كەلىپ ءبىلىم الادى. ورتالىق قۇرعان ۇلجان مىرزاگەلدييەۆا اعىلشىن ءتىلى مەن دومبىرا تارتۋدى ۇيرەنۋگە ىنتا تانىتقان جاستاردىڭ قاتارى كوپ ەكەنىن العا تارتتى.
– وقۋ ورتالىعىنىڭ باستى ماقساتى كوپ بالالى وتباسىلاردىڭ بالالارىنا تەگىن ءبىلىم بەرۋ. مۇنداي وتباسىلاردىڭ بالالارىنا كومەك بەرۋ سەبەبىمىز ولاردىڭ جاعدايى قوسىمشا وقىتۋعا جاعدايى كەلە بەرمەيدى. ءبىز قولداپ، كارانتين تالاپتارىن ساقتاي وتىرىپ بالالارعا جاعداي جاساۋدامىز، – دەدى ۇلجان مىرزاگەلدييەۆا. «ءبىز ۇيدە 5 بالامىز. مەنىڭ وسى جەرگە كەلىپ دومبىرانى ۇيرەنە باستاعانىما 2-3 اي بولدى. قوسىمشا اعىلشىن وقيمىن. ماعان ورتالىق ۇنايدى» دەيدى اسەم مامەتحان.
قازىرگى تاڭدا ەلوردادا اشىلعان 8 ورتالىقتا جۇزدەن اسا قىز-كەلىنشەكتەر جۇمىسپەن قامتىپ وتىر. ال ماماندىعى ساي كەلمەيتىن كەيبىر كوپ بالالى انالار قايتا دايارلاۋ كۋرسىنان وتۋدە.
– جۇمىستىڭ ەڭ ماقساتى انالارعا بالىق بەرمەي قارماق بەرۋ. جۇمىسپەن قامتاماسىز ەتۋ. بۇل انالاردىڭ ىنتاسى، اكىمدىكتىڭ ەمەس. سولاردىڭ ىنتاسىن جۇزەگە اسىرىپ، سولاردىڭ باستامالارىن قولداپ كەي جەرلەردە عيماراتپەن، جيھازبەن كومەكتەسىپ كەيدە ءتۇرلى باعىت بەرىپ وسى ورتالىقتاردىڭ جاندانۋىنا كومەكتەسۋدەمىز. مۇنداي ورتالىقتاردىڭ جۇمىسىن جۇيەلەندىرۋ ءۇشىن الداعى ۋاقىتتا «ءبىر تەرەزە» قاعيداتى بويىنشا قىزمەت كورسەتۋ جوباسى جوسپارلاپ وتىرمىز.
ەڭ باستى ماقستامىز حالقىمىزدىڭ سانىن كوبەيتىپ، دەموگرافياعا ۇلەس قوسقان التىن قۇرساقتى انالار مەن ەرەكشە قاجەتتىلىكتەرى بار بالالاردى تاربيەلەپ وتىرعان جاندارعا قولداۋ كورسەتۋ بولىپ تابىلادى، – دەيدى نۇر-سۇلتان قالالىق ىشكى ساياسات باسقارماسىنىڭ باسشىسى داۋرەن بابامۇرات.
