كونسەرتكە استانانىڭ ىرگەتاسىن قالاعان، دامۋى مەن وركەندەۋىنە ولشەۋسىز ۇلەس قوسقان تۇلعالار قاتىستى.
ونىڭ ىشىندە ساۋلەتشىلەر، قۇرىلىسشىلار، ۇستازدار مەن دارىگەرلەر، مادەنيەت قىزمەتكەرلەرى، ءتارتىپ ساقشىلارى، مەملەكەتتىك جانە كوممۋنالدىق قىزمەت وكىلدەرى، سونداي-اق شاعىن جانە ورتا بيزنەستەگى كاسىپكەرلەر مەن ءار سالانىڭ مايتالمان ماماندارى بولعان ەڭبەك ارداگەرلەرى بار.
– 10 جەلتوقسان – تاريحي كۇن! بۇل – بۇرىنعى اقمولانىڭ استانا بولعان كۇنى. كوپ جىلداردان كەيىن، مىنە، وسى تاريحي ءساتتى ەرەكشە ىقىلاسپەن اتاپ ءوتىپ جاتىرمىز. سول كەزدەگى اتقارىلعان ەرەن ەڭبەكتىڭ ارقاسىندا بۇگىن ەلوردامىز ەڭسەلى مەگاپوليسكە اينالدى.
العاشقى جىلدارى ءبىز كەلگەندە مۇندا 200 مىڭنىڭ ۇستىندە عانا تۇرعىن بولاتىن. ءقازىر تۇرعىندارىنىڭ سانى 1،5 ميلليونعا تاقاپ قالدى.
وسى كەشتەن دە شاھاردىڭ ناعىز مادەنيەت ورداسىنا اينالعانىن بايقاپ وتىرمىز.
جالپى، استاناعا العاش كەلگەن ادام ەلوردانىڭ ەڭسەسىن تىكتەۋىنە بار كۇش-جىگەرىن سالدى دەپ ويلايمىن.
![](/uploads/images/20240127143521977.jpg)
كونسەرتتى ق ر ەڭبەك سىڭىرگەن قايراتكەرى قايرات باەكەنوۆ «استانا» انىمەن اشقان سوڭ، جۇرگىزۋشىلەر بۇگىنگى تاريحي كۇننىڭ ماڭىزىن ايتىپ، ەلوردانىڭ دامۋىنا ۇلەس قوسۋشى بارلىق استانالىقتاردى اتاۋلى كۇنمەن قۇتتىقتادى.
ەركەش شاكەيەۆتىڭ ءانى «پەرۆوە ۋترو ستوليسى» اتتى ءاندى حالىقارالىق بايقاۋلاردىڭ لاۋرەاتتارى دينايا جانە الەن سامىكەن شىرقادى.
اسەم ءان مەن «استانالىق سيرك» ءارتىسى تيمۋر اقتوتىنىڭ ونەرىن تىڭدارمان تەبىرەنە تاماشالادى.
كەش بارىسىندا جۇرگىزۋشىلەر كورەرمەندەرگە استانا تۋرالى ۆيكتورينالىق ساۋالدار قويىپ، سۇراقتىڭ جاۋابىن ءدال تاپقاندارعا سىي-سياپات ۇسىنىپ، كوپتىڭ كوڭىلىن ءبىر سەرپىپ الدى.
ق ر ەڭبەك سىڭىرگەن ءارتىسى سەكەن تۇرىسبەكوۆ جانە ق ر ەڭبەك سىڭىرگەن قايراتكەرى رەنات گايسين «اقجاۋىن»، حالىقارالىق «سلاۆيان بازارى» بايقاۋىنىڭ لاۋرەاتى امىرە «قىزدار-اي»، استانالىق جاس ءانشى، حالىقارالىق جانە رەسپۋبليكالىق بايقاۋلاردىڭ لاۋرەاتى ءمادي سىزدىقوۆ “اتامەكەن” اندەرىن شىرقادى.
ال كونسەرت قازاقستاننىڭ حالىق ءارتىسى، ەڭبەك ەرى روزا رىمبايەۆانىڭ «استانام – اق وردام» انىمەن ءوز مارەسىنە جەتتى.