استانا قالاسىندا ەكسپو حالىقارالىق كورمەسىنىڭ اياسىندا الماتى وبلىسىنىڭ مادەنيەت كۇندەرى باستالدى. مادەنيەت كۇندەرى «قازاقستان» ورتالىق كونسەرت زالىندا ءسۇيىنباي اتىنداعى الماتى وبلىستىق فيلارمونياسىنىڭ جانە «الاتاۋ اۋەندەرى» ونەر ۇجىمىنىڭ «جەتىسۋ – جۇماق مەكەنىم» اتتى كونسەرتىمەن سالتاناتتى تۇردە اشىلدى.

شاراعا الماتى وبلىسىنىڭ اكىمى اماندىق باتالوۆ، استانا قالاسىنىڭ اكىمى اسەت يسەكەشيەۆ، مادەنيەت جانە سپورت ءمينيسترى ارىستانبەك مۇحامەدي ۇلى جانە "استانا ەكسپو-2017" ۇك" اق باسقارما ءتوراعاسى احمەتجان ەسىموۆ ارنايى قاتىسىپ، ەڭ الدىمەن زال فويەسىندەگى وبلىس سۋرەتشىلەرى مەن قولونەرشىلەرىنىڭ كورمەسىمەن تانىستى.

كونسەرتتە م.تولەبايەۆ اتىنداعى حالىق اسپاپتار وركەسترى، «التىناي» مەملەكەتتىك حالىقتىق بي ءانسامبلى، «سازگەن»، «ادىرنا»، «قۇلانساز» فولكلورلىق-ەتنوگرافيالىق انسامبلدەرى، «تالدىقورعان اۋەندەرى» ءانسامبلى، قازاقستان رەسپۋبليكاسىنىڭ ەڭبەك سىڭىرگەن ارتىستەرى قانات پەن ايتگۇل قۇدايبەرگەنوۆتار، ۇلجان ايناقۇلوۆا جانە باسقا دا انشىلەر ونەر كورسەتتى. مازمۇندى شارادا جەتىسۋدىڭ باي ونەرى مەن مادەنيەتى، كوپەتنوستى حالقىنىڭ بىرلىگى پاش ەتىلىپ، «ەكسپو» كورمەسىنە ارنايى جازىلعان «EXPO مەرەكە» ءانى مەن «EXPO» ءبيى دە كورەرمەندەر نازارىنا ۇسىنىلدى.



جالپى الماتى وبلىسىنىڭ استاناداعى مادەنيەت كۇندەرىنە جەتىسۋ وڭىرىنەن 400-گە جۋىق ارتىستەر، سۋرەتشىلەر، سپورتشىلار، قولونەر شەبەرلەرى جانە باسقا دا ونەر يەلەرى كەلگەن.

مادەنيەت كۇندەرى 11-15 شىلدە ارالىعىندا وتەدى. جەتىسۋ ايماعى استانالىقتاردى ءتۇرلى تەاترلىق قويىلىمدارىمەن، كونسەرتتەرىمەن، قولونەر جانە سۋرەتشىلەر كورمەلەرىمەن، سپورتتىق جارىستارىمەن قۋانتاتىن بولادى.