بۇل تۋرالى Dalanews.kz قازاقستان دزيۋدو فەدەراسياسىنىڭ باسپا ءسوز قىزمەتىنە سىلتەمە جاساپ حابارلايدى.
ءتورت كۇنگە جالعاساتىن قۇرلىقتىق دودادا تاتامي شەبەرلەرى جەكەلەي جانە ارالاس-كوماندالىق جارىس بويىنشا ءوزارا مىقتىنى انىقتايدى. حالىقارالىق دزيۋدو فەدەراسياسىنىڭ (IJF) كۇنتىزبەسىنە سايكەس وتكىزىلەتىن جارىسقا ازيانىڭ 30 ەلىنەن 400-گە جۋىق دزيۋدوشى قاتىسادى دەپ جوسپارلانۋدا.
«قازاقستان دزيۋدودان الەمدىك باسەكەلەردى وتكىزۋ بويىنشا مول تاجىريبەگە يە. وسى ۋاقىتقا دەيىن حالىقارالىق دزيۋدو فەدەراسياسى ەلىمىزگە الەمدىك ليسەنزيالىق گران-پري جارىستارىنان بولەك، ەرەسەكتەر اراسىنداعى الەم چەمپيوناتى (2015، نۇر-سۇلتان) مەن جاسوسپىرىمدەر اراسىنداعى الەم چەمپيوناتىن (2019، الماتى) وتكىزۋدى سەنىپ تاپسىرعان. 2017 جىلدان بەرى ازيا دزيۋدو وداعىنىڭ كۇنتىزبەسىنە سايكەس جىلدا ەلىمىزدە جاسوسپىرىمدەر، جاستار جانە ەرەسەكتەر اراسىندا ءداستۇرلى تۇردە ەكى رەت ازيا كۋبوگى وتكىزىلىپ كەلە جاتىر. ەندى مىنە، بيىل ازيا چەمپيوناتىن وتكىزۋ قۇقىعىنا يە بولدىق. بۇل تەك سپورتشىلارىمىز ءۇشىن ەمەس، وتاندىق دزيۋدو وتباسى، جانكۇيەرلەر ءۇشىن تاماشا جاڭالىق.
مۇنداي ءىرى جارىستاردى ەلىمىزدە وتكىزۋ ارقىلى ءبىز سپورتشىلارىمىزدىڭ تاجىريبەسىن شىڭداپ قانا قويماي، الەمدىك ارەنادا سپورت دەرجاۆاسى رەتىندە قالىپتاسقان ءيميدجىمىزدى نىعايتا تۇسەمىز.
ەلوردا تاتاميىندە ازيا ۇزدىكتەرى باس قوسادى، جاڭا ەسىمدەر شىعادى. كۋميرلەرىنە قاراپ بوي تۇزەپ كەلە جاتقان جاس بۋىن ءۇشىن دە بۇل قۋانىشتى جاڭالىق ءارى كەرەمەت مۇمكىندىك دەپ ويلايمىن.
ءوز كەزەگىندە، باپكەرلەر قوسىنىنىڭ شەشىمىمەن قازاقستان ەرلەر جانە ايەلدەر قۇراماسىنان نەگىزگى جانە قوسالقى قۇراما سپورتشىلارى ارالاس قاتىسادى. ۇلتتىق قۇراما ساپىنداعى دزيۋدوشىلار ءۇشىن قۇرلىقتىق باسەكە جىلدىڭ باستى دوداسى الەم چەمپيوناتىنا دايىندىق بولىپ سانالسا، قۇراما قاتارىنا ەندى قوسىلعان جاس دزيۋدوشىلار ءۇشىن ازيا چەمپيوناتىنا قاتىسۋ ءىرى جارىستىڭ اتموسفەراسىن سەزىنىپ، تاجىريبە جيناۋعا مۇمكىندىك بەرەدى»، - دەيدى قازاقستان دزيۋدو فەدەراسياسى پرەزيدەنتىنىڭ مىندەتىن اتقارۋشى اسحات جىتكەيەۆ.
ايتا كەتەرلىگى، IJF ەرەجەسى بويىنشا، ازيا چەمپيوناتىنىڭ جەڭىمپازدارى مەن جۇلدەگەرلەرىنە وليمپيادالىق رەيتينگتە ۇپاي ساندارى قوسىلادى. اتاپ ايتقاندا، جەڭىمپاز 700 ۇپايدى ەنشىلەسە، 2 ورىن يەگەرى 490، ال 3 ورىنعا 350 ۇپايدان ۇلەستىرىلەدى.
