وتكەن جىلدىڭ تامىز ايىنان باستاپ قالالىق سپورت ورتالىعىندا استانا قالاسىنىڭ دەنە شىنىقتىرۋ جانە سپورت باسقارماسى ۆەدومستۆولىق باعىنىستاعى ۇيىمدارىنا تەرەڭدەتىلگەن مەديسينالىق تەكسەرۋلەر جۇرگىزۋدى باستاعان. بيىل 1، 2، 4، 5، 8 بجمورسم-مەن وليمپيادالىق سپورت تۇرلەرى بويىنشا سپورتتى دامىتۋ ديرەكسياسىنا، وليمپيادالىق ەمەس سپورت تۇرلەرىنەن سپورتتى دامىتۋ ديرەكسياسىنا مەديسينالىق تەكسەرۋلەر جۇرگىزدى. مەديسينالىق تەكسەرىستەن وتكەن سپورتشىلاردىڭ جالپى سانى شامامەن 6575 ادامدى قۇراعان.
بۇگىندە قالادا سپورتشىلار تاراپىنان قاندايدا ءبىر شاعىمدار مەن وتىنىشتەر بولعان جاعدايدا فيزيوتەراپيالىق قىزمەت كورسەتۋ، سپورتشىلاردى ساۋىقتىرۋ، وڭالتۋ جانە قالپىنا كەلتىرۋ جۇمىسى جۇرگىزىلەتىنىن ايتا كەتۋىمىز كەرەك.
– ورتالىقتىڭ بىرەگەيلىگى – سپورتپەن بەلسەندى شۇعىلدانىپ، سالاۋاتتى ءومىر سالتىن ۇستاناتىن ادامدارعا، كاسىبي سپورتشىلارعا دياگنوستيكالاۋ، وڭالتۋ، قالپىنا كەلتىرۋ جانە ەمدەۋ بويىنشا كەڭ ءتۇرلى مەديسينالىق قىزمەت كورسەتەدى. ءبىزدىڭ سپورتتىق مەديسينالىق ورتالىق سوڭعى وزىق ۇلگىدەگى ارنايى مەديسينالىق جابدىقتارىمەن جابدىقتالعان. ەندى سپورتشىلار باسقا قالالارعا، شەتەلدەرگە بارماي-اق، جەكە كلينيكالارعا نەمەسە جەكە ماماندارعا جۇگىنبەي-اق، مەديسينالىق دياگنوستيكا، دەنە دايارلىعى مەن قيمىل-قوزعالىسىنىڭ دەڭگەيىن انىقتايتىن كەشەندى تەستىلەۋدەن وتە الادى، – دەدى ازامات ەرقاسىموۆ.
ورتالىقتا جاراقات العان سپورتشىلاردى وڭالتۋ جانە قالپىنا كەلتىرۋ جۇمىستارى ءجۇرىپ جاتىر.
بيىل ورتالىق قوسىمشا مامانداندىرىلعان مەديسينالىق، وڭالتۋ جانە فيزيوتەراپيالىق جابدىقتاردى ساتىپ الۋدى جوسپارلاپ وتىر. بۇل جارىستاردان نەمەسە جاراقاتتاردان كەيىن سپورتشىلاردى قالپىنا كەلتىرۋ جانە وڭالتۋ ءىسىن جەدەلدەتۋگە مۇمكىندىك بەرەدى.
سپورت مەديسيناسى جانە سپورت پسيحولوگياسى بويىنشا باپكەرلەر مەن سپورتشىلارعا ارنالعان دارىستەر كۋرسىن باستاۋ جوسپارلانىپ وتىر.
استانا مەديسينا ۋنيۆەرسيتەتىمەن جانە نازاربايەۆ ۋنيۆەرسيتەتىمەن سپورت سالاسىندا عىلىمي زەرتتەۋلەر جۇرگىزۋ، بولاشاق جانە قازىرگى سپورت مەديسيناسى دارىگەرلەرىن پراكتيكالىق وقىتۋ بويىنشا ىنتىماقتاستىق تۋرالى مەموراندۋمدارعا قول قويۋ جوسپارلانعانىن دا ايتا كەتۋىمىز كەرەك.
ورتالىقتىڭ الداعى جىلدارعا ارنالعان جوسپارىندا – قۇرامىنا سپورت مەديسيناسى دارىگەرلەرى، رەابيليتولوگتار، فيزيوتەراپيەۆتەر، ەمدىك جاتتىعۋ نۇسقاۋشىلارى، سپورت پسيحولوگى، ديەتولوگ-نۋتريسسولوگ سياقتى ماماندار كىرەتىن كەشەندى عىلىمي توپ اشۋدى كوزدەپ وتىر.
توپتىڭ ماقساتى جاڭا ادىستەردى، تەحنولوگيالاردى جانە سپورتشىلارعا ارنالعان ۇسىنىستاردى ازىرلەۋ جانە جەتىلدىرۋ ارقىلى سپورتشىلار مەن مەديسينا قىزمەتكەرلەرىن دايىنداۋدىڭ تيىمدىلىگىن ارتتىرۋ بولادى.
