وبلىستاعى ەگىس القاپتارىن اعىن سۋمەن قامتۋ ماسەلەسىنە قاتىستى كەزەكتى رەت جاۋاپتى باسشىلاردىڭ باسىن قوسقان تۇركىستان وبلىسىنىڭ اكىمى دارحان ساتىبالدى شارۋالاردى اعىن سۋمەن قامتۋدى جۇيەلەپ، تۇراقتى باقىلاۋدا ۇستاۋدى قاتاڭ تاپسىردى.
وسى اۋماقتاعى سۋارمالى جەرلەردىڭ بارلىعى وزبەكستاننان كەلەتىن ترانسشەكارالىق «دوستىق» ماگيسترالدى كانالى ارقىلى سۋمەن قامتاماسىز ەتىلەدى.
بۇگىنگى كۇنى سۇرانىسقا ساي شارۋالارعا قاجەتتى سۋدى جەتكىزۋ ءۇشىن ماشينالىق كانال ىسكە قوسىلىپ، قوسىمشا قاجەتتى سۋ جەتكىزىلۋدە.
سونىمەن قاتار وبلىستىڭ شاردارا، وتىرار اۋداندارى مەن ارىس قالاسىنداعى 75 مىڭ گەكتار سۋارمالى جەرلەرگە شارۋالاردىڭ سۇرانىسىنا سايكەس «قىزىلقۇم» ماگيسترالدى كانالى ارقىلى 50 م³/سەك اعىن سۋ بوساتىلۋدا. قاجەتتىلىك تولىقتاي قامتاماسىز ەتىلگەن. جالپى وبلىستا جوسپارلانعان 488،6 مىڭ گەكتار جەر جىرتۋ جانە 115 مىڭ گەكتار سور شايۋ جۇمىستارى تولىعىمەن اياقتالدى.
– ەل پرەزيدەنتى قاسىم-جومارت توقايەۆ ءوز جولداۋىندا سۋ نىساندارىنىڭ ەكوجۇيەسىن ساقتاپ، ونى ۇنەمدى پايدالانۋ ءۇشىن اسا ماڭىزدى كانالدار قايتا جاڭعىرتىلاتىنى تۋرالى ايتقان بولاتىن. مەملەكەت باسشىسى سونىمەن بىرگە جاڭا تەحنولوگيالار مەن سيفرلاندىرۋ ارقىلى سۋدى ۇنەمدەۋگە كوشىرۋدى تاپسىردى.
بۇل رەتتە وسى سۋ نىساندارىن جەرگىلىكتى دەڭگەيدە ءتيىمدى پايدالانۋ ارقىلى ورداباسى، وتىرار، بايدىبەك، ساۋران اۋداندارى مەن ارىس، كەنتاۋ قالالارىنىڭ 80 مىڭ گەكتارعا جۋىق سۋارمالى جەرىن جانە تۇركىستان قالاسىن كوگالداندىرۋ جۇمىستارىن اعىن سۋمەن ۋاقتىلى قامتاماسىز ەتۋگە مۇمكىندىك بەرىلىپ وتىر. ەلىمىزدەگى سۋارمالى القاپتاردىڭ 4/1 بولىگى تۇركىستان وبلىسىنا تيەسىلى. سوندىقتان اعىن سۋ ماسەلەسى وتە وزەكتى جانە تۇراقتى نازاردا، – دەدى وبلىس اكىمى دارحان ساتىبالدى.
[caption id="attachment_89003" align="aligncenter" width="800"]
default[/caption]
بۇگىندە وڭىردە شارۋالاردىڭ سۋدى قاجەتتىلىكتەن ارتىق پايدالانۋىنا، اعىن سۋ ىسىرابىنا جول بەرمەۋ جانە سۋ بەرۋ ءتارتىبىن رەتتەۋ ءۇشىن وبلىستا ناقتى تاريف بەكىتىلگەن. ناتيجەسىندە شارۋالارعا اعىن سۋدى تەك قاجەتتىلىكتەرىنە سايكەس ءبولۋ ءتارتىبى ەنگىزىلگەن. سونىمەن قاتار سۋ شىعىنىن ۇنەمدەۋ ماقساتىندا «تۇركىستان» ماگيسترالدى كانالىنىڭ ءبىر بولىگىن تەمىر بەتونمەن قاپتاۋ جۇمىستارى اياقتالىپ، بارلىق شليۋزدارداعى سۋ ولشەگىشتەر ەسەپكە الىنىپ، سۋ بالانسىن ساقتاۋ جۇمىستارى ءبىر جۇيەگە كەلتىرىلگەن.
بۇگىنگى كۇنى «شاردارا» سۋ قويماسى مەن «كوكساراي» سۋ رەتتەگىشىندە، «قوسقارعان» جانە «كەڭساي-قوسقارعان-2» سۋ قويمالارىندا سۋ جەتكىلىكتى. وڭىردەگى سۋ تاپسىشىلى ماسەلەسىن شەشۋ ءۇشىن ءبىرقاتار سۋ نىساندارىنىڭ جوبالارى ازىرلەنۋدە. «بايدىبەك اتا» سۋ قويماسىن سالۋ جوباسى سالىنعاندا سۋارۋ ماۋسىمىندا «بوگەن» سۋ قويماسىنا 68 ملن.م³ اعىن سۋ قوسىمشا جەتكىزىلەدى. «بورالداي» سۋ قويماسى جوباسى ناتيجەسىندە سۋارۋ ماۋسىمىندا «بوگەن» سۋ قويماسىنا 65 ملن. م³ اعىن سۋ قوسىمشا جەتكىزىلەدى. ەكى قويمانى سالۋ ەسەبىنەن الداعى جىلدارى تۇركىستان ءوڭىرى كەپىلدى اعىن سۋمەن قامتاماسىز ەتىلەدى.
بۇدان بولەك، سۋ نىساندارىن قالپىنا كەلتىرۋ، مەليوراتيۆتىك جاعدايىن جاقسارتۋ ماقساتىندا، وبلىس اكىمىنىڭ تاپسىرماسىمەن 15 سۋ نىسانىن كۇردەلى جوندەۋ، 5 سۋ نىسانىن اعىمداعى جوندەۋ جۇمىستارىنا وبلىستىق بيۋدجەتتەن 3،7 ملرد. تەڭگە قارجى ءبولىندى. ناتيجەسىندە 63 شاقىرىم كانال كۇردەلى جانە اعىمداعى جوندەۋدەن وتكىزىلىپ، 11،2 مىڭ گەكتار جەردىڭ سۋمەن قامتاماسىز ەتىلۋى جاقسارادى.
«تۇران سۋ» شجق مكك-ن ءوز قارجىسى ەسەبىنەن بيىل ورداباسى، ساۋران اۋداندارى مەن ارىس قالاسىندا 230 شاقىرىم كانالدارعا مەحانيكالىق تازالاۋ جۇمىستارىن جۇرگىزۋ جوسپارلانىپ، بۇگىنگى تاڭدا 72 شاقىرىمعا تازالاۋ جۇمىستارى جۇرگىزىلدى.
توزىعى جەتكەن سۋ نىساندارىن قالپىنا كەلتىرۋ جۇمىستارىن جانداندىرۋ ماقساتىندا سايرام اۋدانىندا توتەنشە جاعداي كاۋپى بار «اقباي قاراسۋ» كانالىن كۇردەلى جوندەۋ، شاردارا اۋدانىندا كانالداردى كۇردەلى جوندەۋ، كەلەس اۋدانىندا جالپى 75 كانالدى اعىمداعى جوندەۋ كوزدەلىپ وتىر.
سونداي اق 5 اۋداندا ورنالاسقان 12 سۋ قويمالاردى اۋداندىق مەنشىكتەن وبلىستىق كوممۋنالدىق مەنشىككە قابىلداۋ شارالارى اتقارىلۋدا.
