قازاقستاندا ەرلەر ءۇشىن زەينەتكە شىعۋ جاسى — 63، ال ايەلدەر ءۇشىن — 61 جاس. دەگەنمەن كەيبىر ازاماتتار بۇل جاسقا جەتپەي-اق زەينەتاقى الۋعا قۇقىلى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى، دەپ حابارلايدى Dalanews.kz.
حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ زەينەتاقىمەن جانە الەۋمەتتىك قامسىزداندىرۋ باسقارماسىنىڭ باسشىسى انەل شەنەيەۆا بۇل تۋرالى ناقتى تۇسىنىكتەمە بەردى. ونىڭ ايتۋىنشا، الەۋمەتتىك كودەكسكە سايكەس، بەس جانە ودان دا كوپ بالانى سەگىز جاسقا دەيىن تاربيەلەپ وسىرگەن ايەلدەر 53 جاستان باستاپ زەينەتكە شىعۋعا قۇقىلى.
سونداي-اق ول مەملەكەت باسشىسىنىڭ تاپسىرماسىمەن 2024 جىلعى 1 قاڭتاردان باستاپ زياندى ەڭبەك جاعدايلارىندا جۇمىس ىستەيتىن ازاماتتاردى الەۋمەتتىك قولداۋ شارالارى ەنگىزىلگەنىن ايتتى. اتاپ ايتقاندا، كەمىندە جەتى جىل بويى مىندەتتى كاسىپتىك زەينەتاقى جارنالارىن اۋدارىپ كەلگەن، 55 جاسقا تولعان ازاماتتارعا ارنايى الەۋمەتتىك تولەم تاعايىندالادى.
"بۇل تولەم زياندى جاعدايدا ەڭبەك ەتكەن ازاماتتارعا زەينەت جاسىنا جەتكەنگە دەيىن جۇمىستان كەتىپ، الەۋمەتتىك قولداۋ الۋىنا مۇمكىندىك بەرەدى"، — دەدى شەنەيەۆا.
ەسكە سالساق، بۇل شارالار ەڭبەك جاعدايىنا بايلانىستى زەينەتكە ەرتەرەك شىعۋ مۇمكىندىگىن قاراستىرادى جانە ازاماتتاردىڭ الەۋمەتتىك قورعالۋىن كۇشەيتۋگە باعىتتالعان.
