7 ساۋىردە قوستاناي قالاسىنىڭ اكىمشىلىك سوتى "كوكتەم" باعبان سەرىكتەستىگىنىڭ تۇرعىنى 39 جاستاعى قايرات مۇسابايەۆتى 10 تاۋلىككە قامادى، دەپ حابارلايدى Dalanews.kz.
قوستاناي وبلىستىق سوتىنىڭ باسپا ءسوز قىزمەتىنىڭ ازاتتىققا جولداعان جازباشا جاۋابىندا ءىستىڭ جاي-جاپسارى ايتىلمايدى. سوت قاۋلىسى "سوت كابينەتىندە" جاريالانعانى جازىلعان.
اقپاراتقا قاراعاندا "كوكتەم" تۇرعىنى "قوعامدىق ورىندا بىلاپىت ءسوز ايتقانى ءۇشىن" اكىمشىلىك جازاعا تارتىلعان. ول ۆيدەو ءتۇسىرىپ، الەۋمەتتىك جەلىدە جاريالاعان. سوت قاۋلىسىندا ونىڭ ناقتى قانداي "بىلاپىت ءسوز" ايتقانى كورسەتىلمەگەن. دەگەنمەن جاۋاپكەردىڭ كىناسى "جينالعان ايعاقتارمەن" دالەلدەنگەنى جازىلعان.
بۇعان دەيىن الەۋمەتتىك جەلىدە ەر ادامنىڭ پرەزيدەنت توقايەۆ پەن ۇكىمەتتى سىناپ، ەموسيامەن پىكىر ءبىلدىرىپ جاتقانى جونىندە ۆيدەو جاريالانعان.
"سونىڭ بارىنە سىزدەر جول بەردىڭىزدەر" دەيدى ۆيدەودا ەر ادام. ول قانشاما ادامنىڭ باسپاناسىز قالعانىن، مۇلكىنەن ايىرىلعانىن، ءتىپتى كەي اۋدانداردا ادام ءولىمى بولعانىن ەسكە سالادى.
"قىستا توڭامىز، جازدا ورتەنەمىز. كوكتەم كەلەتىنىن بولجاي الماي، كەنەتتەن سۋعا باتامىز. ەشقاشان ەشتەڭەگە دايىن بولعان ەمەسسىزدەر" دەيدى ۆيدەو اۆتورى. ۆيدەونى وپپوزيسيا بەلسەندىلەرى مەن تەلەگرام-ارنالار جاريالادى.
وسىعان ۇقساس ايىپپەن اكىشىلىك قاماۋدا بولعان 57 جاستاعى اقىلبەك تەمىرعالينوۆ تا 17 ساۋىردە قاماۋدان بوساپ شىقتى. ول اقسۋ قالاسىندا يزولياتوردا التى كۇن قاماۋدا وتىردى.
پاۆلودار وبلىسىنىڭ تۇرعىنى 11 ساۋىردە سۋ تاسقىنىنا بايلانىستى ۇكىمەتتى سىناپ، الەۋمەتتىك جەلىدە جازبا جاريالاعان. تەمىرعالينوۆتىڭ سوزىنشە، ونى دا "قوعامدىق ورىندا بىلاپىت ءسوز ايتتى" دەپ ايىپتاعان. مۇندا الەۋمەتتىك جەلى قوعامدىق ورىنعا تەلىنگەن. "ءادىل ءسوز" باسپا ءسوز قورعاۋ ۇيىمىنىڭ ساراپشىسى عاليا اجەنوۆا جازباداعى "ءۇش ارىپتەن قۇرالعان ءسوز" جەكە ءبىر ادامعا باعىتتالماعانىن جانە سۋ تاسقىنىنا بايلانىستى جەكە ادامنىڭ پىكىرى ەكەنىن ايتقان.
- ناۋرىزدىڭ سوڭىندا پرەزيدەنت قاسىم-جومارت توقايەۆ ۇكىمەت پەن اكىمدەردى "سالعىرتتىعى جانە كاسىبي ەمەس ارەكەتى ءۇشىن" سىناعان. ول ۇكىمەت پەن اكىمدىكتەردىڭ بىرىگىپ ارەكەت ەتپەي وتىرعانىن ايتىپ، سۋ تاسقىنىنان زارداپ شەككەن ايماقتاردا تۇرعىنداردىڭ مۇلىكتەرىنەن ايىرىلعانىنا قىنجىلعان.
- قازاقستاندا سۋ تاسقىنى العاش بولعان ايماقتاردىڭ ءبىرى قوستاناي وبلىسى. 28 ناۋرىزدا ارقالىق قالاسىندا، جانگەلدى، امانگەلدى اۋداندارىندا توتەنشە جاعداي جاريالاندى. 6 ساۋىردە قوستاناي اكىمى مارات جۇندىبايەۆ قالادا توتەنشە جاعداي جاريالانعانىن مالىمدەدى. بيلىكتىڭ 17 ءساۋىر كۇنگى اقپاراتىنشا، قوستاناي وبلىسى جانگەلدى اۋدانى تورعاي اۋىلىنان 2834 ادام الدىن الا ەۆاكۋاسيالانعان. تجم حابارلاماسىندا ولاردىڭ قانشاسى ەۆاكۋاسيا پۋنكتەرىنە شوعىرلانعانى ايتىلماعان. قازاقستاندا سۋ تاسقىنى ايماقتارىنان جالپى 117 مىڭ ادام ءقاۋىپسىز جەرگە كوشىرىلگەن.
ەسكە سالايىق، بۇعان دەيىن سولتۇستىك قازاقستان وبلىسىندا پوليسەيلەر سۋ تاسقىنىنا بايلانىستى جالعان اقپارات تاراتقانداردى جاۋاپقا تارتقانى تۋرالى حابارلانعان ەدى.
وسى تۇستا پوليسيا ازاماتتاردان تەك رەسمي اقپاراتقا سەنۋدى سۇرايدى.
"فەيكتەر ادامدارعا جاعدايدى باقىلاۋعا كەدەرگى كەلتىرەدى. توتەنشە جاعداي ۋاقىتىندا بىرەۋلەر قاۋەسەتتەرگە دە سەنىپ قالۋى مۇمكىن"، - دەپ جازىلعان ءىىم حابارلاماسىندا.
مىسالى، TikTok-تا پەتروپاۆلداعى سۋ باسقان پودگور اۋدانىندا تاسقىن سۋمەن بىرگە قاسقىرلار مەن جابايى قاباندار پايدا بولدى دەگەن حابارلاما پايدا بولدى. پوليسەيلەر جالعان اقپارات تاراتقان ادامدى تاپتى، ول 20 جاستاعى پەتروپاۆلدىق بولىپ شىقتى.
الەۋمەتتىك جەلىدە تاعى ءبىر ادام تاسقىن سۋدان ەكى بالا قايتىس بولدى دەگەن جالعان اقپارات تاراتتى. بۇل اقپارات تا شىندىققا جاناسپايدى.
"شىندىققا سايكەس كەلمەيتىن اقپاراتتى تاراتۋشىلاردىڭ ەكەۋىنە دە اكىمشىلىك ماتەريال جينالادى. ق ر اكىمشىلىك قۇقىقبۇزۋشىلىق تۋرالى كودەكسىنىڭ 456-2-بابىنىڭ 3-بولىگىنە سايكەس "جالعان اقپاراتتى ورنالاستىرۋ، تاراتۋ" ولارعا 20 اەك-كە دەيىنگى مولشەردە ايىپپۇل سالىنۋى مۇمكىن"، - دەدى سقو پد ەكسترەميزمگە قارسى ءىس-قيمىل باسقارماسى وكىلى.
