7 sáýirde Qostanai qalasynyń ákimshilik soty "Kóktem" baǵban seriktestiginiń turǵyny 39 jastaǵy Qairat Musabaevty 10 táýlikke qamady, dep habarlaidy Dalanews.kz.
Qostanai oblystyq sotynyń baspasóz qyzmetiniń Azattyqqa joldaǵan jazbasha jaýabynda istiń jai-japsary aitylmaidy. Sot qaýlysy "sot kabinetinde" jariialanǵany jazylǵan.
Aqparatqa qaraǵanda "Kóktem" turǵyny "qoǵamdyq orynda bylapyt sóz aitqany úshin" ákimshilik jazaǵa tartylǵan. Ol video túsirip, áleýmettik jelide jariialaǵan. Sot qaýlysynda onyń naqty qandai "bylapyt sóz" aitqany kórsetilmegen. Degenmen jaýapkerdiń kinási "jinalǵan aiǵaqtarmen" dáleldengeni jazylǵan.
Buǵan deiin áleýmettik jelide er adamnyń prezident Toqaev pen úkimetti synap, emotsiiamen pikir bildirip jatqany jóninde video jariialanǵan.
"Sonyń bárine sizder jol berdińizder" deidi videoda er adam. Ol qanshama adamnyń baspanasyz qalǵanyn, múlkinen aiyrylǵanyn, tipti kei aýdandarda adam ólimi bolǵanyn eske salady.
"Qysta tońamyz, jazda órtenemiz. Kóktem keletinin boljai almai, kenetten sýǵa batamyz. Eshqashan eshteńege daiyn bolǵan emessizder" deidi video avtory. Videony oppozitsiia belsendileri men telegram-arnalar jariialady.
Osyǵan uqsas aiyppen ákishilik qamaýda bolǵan 57 jastaǵy Aqylbek Temirǵalinov ta 17 sáýirde qamaýdan bosap shyqty. Ol Aqsý qalasynda izoliatorda alty kún qamaýda otyrdy.
Pavlodar oblysynyń turǵyny 11 sáýirde sý tasqynyna bailanysty úkimetti synap, áleýmettik jelide jazba jariialaǵan. Temirǵalinovtiń sózinshe, ony da "qoǵamdyq orynda bylapyt sóz aitty" dep aiyptaǵan. Munda áleýmettik jeli qoǵamdyq orynǵa telingen. "Ádil sóz" baspasóz qorǵaý uiymynyń sarapshysy Ǵaliia Ájenova jazbadaǵy "úsh áripten quralǵan sóz" jeke bir adamǵa baǵyttalmaǵanyn jáne sý tasqynyna bailanysty jeke adamnyń pikiri ekenin aitqan.
- Naýryzdyń sońynda prezident Qasym-Jomart Toqaev úkimet pen ákimderdi "salǵyrttyǵy jáne kásibi emes áreketi úshin" synaǵan. Ol úkimet pen ákimdikterdiń birigip áreket etpei otyrǵanyn aityp, sý tasqynynan zardap shekken aimaqtarda turǵyndardyń múlikterinen aiyrylǵanyna qynjylǵan.
- Qazaqstanda sý tasqyny alǵash bolǵan aimaqtardyń biri Qostanai oblysy. 28 naýryzda Arqalyq qalasynda, Jangeldi, Amangeldi aýdandarynda tótenshe jaǵdai jariialandy. 6 sáýirde Qostanai ákimi Marat Júndibaev qalada tótenshe jaǵdai jariialanǵanyn málimdedi. Biliktiń 17 sáýir kúngi aqparatynsha, Qostanai oblysy Jangeldi aýdany Torǵai aýylynan 2834 adam aldyn ala evakýatsiialanǵan. TJM habarlamasynda olardyń qanshasy evakýatsiia pýnkterine shoǵyrlanǵany aitylmaǵan. Qazaqstanda sý tasqyny aimaqtarynan jalpy 117 myń adam qaýipsiz jerge kóshirilgen.
Eske salaiyq, buǵan deiin Soltústik Qazaqstan oblysynda politseiler sý tasqynyna bailanysty jalǵan aqparat taratqandardy jaýapqa tartqany týraly habarlanǵan edi.
Osy tusta politsiia azamattardan tek resmi aqparatqa senýdi suraidy.
"Feikter adamdarǵa jaǵdaidy baqylaýǵa kedergi keltiredi. Tótenshe jaǵdai ýaqytynda bireýler qaýesetterge de senip qalýy múmkin", - dep jazylǵan IIM habarlamasynda.
Mysaly, TikTok-ta Petropavldaǵy sý basqan Podgor aýdanynda tasqyn sýmen birge qasqyrlar men jabaiy qabandar paida boldy degen habarlama paida boldy. Politseiler jalǵan aqparat taratqan adamdy tapty, ol 20 jastaǵy petropavldyq bolyp shyqty.
Áleýmettik jelide taǵy bir adam tasqyn sýdan eki bala qaitys boldy degen jalǵan aqparat taratty. Bul aqparat ta shyndyqqa janaspaidy.
"Shyndyqqa sáikes kelmeitin aqparatty taratýshylardyń ekeýine de ákimshilik material jinalady. QR Ákimshilik quqyqbuzýshylyq týraly kodeksiniń 456-2-babynyń 3-bóligine sáikes "Jalǵan aqparatty ornalastyrý, taratý" olarǵa 20 AEK-ke deiingi mólsherde aiyppul salynýy múmkin", - dedi SQO PD ekstremizmge qarsy is-qimyl basqarmasy ókili.
