سماعۇلوۆتىڭ سوزىنشە، قازاقستاندىق اۆتوبيزنەس قاۋىمداستىعى يندۋستريا جانە ينفراقۇرىلىمدىق دامۋ مينيسترلىگىنە وسى ۇسىنىسىن جەتكىزگەن. ييدم ءوز كەزەگىندە بۇل ۇسىنىستى قاراستىرۋ ءۇشىن ونى ۇلتتىق ەكونوميكا مينيسترلىگىنە جولداپ جىبەرىپتى.
بجزق اقشاسىن باسپاناعا عانا ەمەس، قازاقستاندا جاسالعان اۆتوكولىكتى الۋعا دا جۇمساۋ مۇمكىندىگى بەرىلسىن دەگەن ۇسىنىس جاسادىق. ارينە، حالىققا ەڭ كەرەگى باسپانا، ءبىراق ەسكى كولىگىنەن ابدەن شارشاعان، نەمەسە قارا جاياۋ جۇرگەندەردىڭ تاعى ءبىر ارمانى جاڭا كولىك.
حالىققا كولىگىن جاڭارتۋعا مۇمكىندىك بەرىلۋى ءتيىس دەپ ويلايمىز. بۇل يدەيانى كولىك شىعارۋشىلار دا اۆتوكومپانيالار دا قولداۋى كەرەك، – دەگەن ەكەن سماعۇلوۆ.
...
بۇدان بۇرىن جۋرناليست يبراش نۇسىپبايەۆ "نۇرلان سماعۇلوۆتىڭ كەسىرىنەن قارا حالىق قاۋساعان، توزىعى جەتكەن كولىكپەن جۇرۋگە ءماجبۇر" دەپ جازعان.
Dalanews.kz-كە ۇسىنعان ماقالاسىندا ارىپتەسىمىز "وتاندىق اۆتوكولىك نارىعىنداعى باسەكەلەستىكتى بەسىگىندە تۇنشىقتارعان سماعۇلوۆ الىس-جاقىن شەتەلدەن جاڭا كولىك كىرگىزۋگە جانى قاس. سەبەبى «جان باعىپ» وتىرعان بيزنەسىن جوعالتقىسى كەلمەيتىنىن" ايتقان ەدى.
«استانا موتورس» الداعى جىلى حيۋنداي كولىگىن قۇراستىراتىن ءىرى زاۋىت اشامىز دەپ الاقايلادى. «العاشقى ساتىدا زاۋىت جىلىنا 30 مىڭ كولىك قۇرايدى. 2023 جىلى 45 مىڭ كولىك قۇرايتىن قارقىنعا جەتپەك. جاڭا زاۋىت جۇزدەگەن ادامدى جۇمىسقا الىپ، الەۋمەتتىك احۋالدى تۇزەۋگە اتسالىسادى» دەگەن اقپاراتتى كوزىم شالىپ قالدى.
كۇلەيىن بە، جىلايىن با؟ مىنا جاڭالىقتى وقىپ، بىزدەگى بيزنەس پەن بيلىك وكىلدەرىندە تاۋىقتىڭ ميىنداي مي جوقتىعىنا كەزەكتى رەت كوزىڭ جەتەدى»، – دەيدى ارىپتەسىمىز.
ءجۋرناليستىڭ پىكىرىنشە بيلىك جانە بيلىكپەن اۋىز جالاسقان بيزنەس وكىلدەرى كوزبوياشىلىقتى عانا جەتە مەڭگەرگەن. «استانا موتورستىڭ» جۇمىسسىزدىق كورسەتكىشىن ازايتۋداعى ۇلەسى تەڭىزگە تامعان تامشىداي عانا. كومپانيا مەملەكەتكە ماسىل، ءوز كۇنىن ءوزى كورەتىن جاعدايعا جەتكەن جوق، جەتپەيدى دە.
