ەلىمىزدىڭ كيەلى، قاسيەتتى جەرلەرىن ارالاپ، ىشكى ءتۋريزمدى كەڭىنەن ناسيحاتتاۋدى ماقسات تۇتقان دەلەگاسيا قۇرامىندا «ايعاق» تەلەراديو كومپانياسىنىڭ باس ديرەكتورى دۋلات ءابىش، پرەزيدەنتتىڭ كۋرستاسى، كسرو مەملەكەتتىك سىيلىعىنىڭ لاۋرەاتى ءامانالى ءابدىرامانوۆ جانە دە قۇرامىندا اكادەميك، عىلىم دوكتورلارى، ەلىمىزگە ەڭبەگى سىڭگەن سۋرەتشىلەر، ءدىن وكىلدەرى، شىمكەنت قالاسىنىڭ قۇرمەتتى ازاماتتارى بار مارتەبەلى مەيمانداردى وتىرار مەملەكەتتىك ارحەولوگيالىق-قورىق مۋزەيىندە اۋدان اكىمى ەرلان ايتاحانوۆ ءوزى كۇتىپ الىپ، بيىلعى جىلى كۇردەلى جوندەۋدەن ءوتىپ، زاماناۋي ۇلگىدە قايتا جابدىقتالعان مۇراجاي جادىگەرلەرىمەن جان-جاقتى تانىستىردى.
مۇنان سوڭ وتىرار توبەگە اتباسىن بۇرعان قۇرمەتتى قوناقتار كونە شاھاردىڭ وتكەنى مەن بۇگىنى جونىندە قۇندى ماعلۇماتتار الدى.
ەلباسىمىزدىڭ تاپسىرماسىنا ساي وڭىرىمىزدەگى تۋريزم كلاستەرىن دامىتۋ ماقساتىندا وتىرار توبە مەن ارىستانباب كەسەنەسى توڭىرەگىندەگى قىزۋ جۇرگىزىلىپ جاتقان كورىكتەندىرۋ، اباتتاندىرۋ جانە قۇرىلىس جۇمىستارىمەن ارنايى ستەند ارقىلى دەلەگاسيا مۇشەلەرىنە تانىستىرعان اۋدان باسشىسى الداعى ۋاقىتتا كاسىپكەرلەردى تارتا وتىرىپ، كەلگەن تۋريستەردىڭ كوڭىلىنەن شىعاتىن ۇتىمدى جوبالاردى جۇزەگە اسىرا بەرەتىندىگىن اتاپ ءوتتى.
بابتاردىڭ بابى ارىستانباب كەسەنەسىنە زيارات جاساپ، بابالار رۋحىنا قۇران باعىشتاعان مارتەبەلى مەيماندارعا اۋدان اكىمى ەرلان قۋانىش ۇلى قازاقي داستۇرگە ساي اۋدانىمىزدىڭ تاريحى مەن شەجىرەسىنەن سىر شەرتەتىن تاريحي قۇندى كىتاپتاردى دەلەگاسيا مۇشەلەرىنە تارتۋ ەتىپ، ولاردىڭ ودان ءارى جالعاساتىن ساپارلارىنا ساتتىلىك تىلەدى.
