جينالىستى ق.ي. ساتبايەۆ اتىنداعى قازۇتزۋ- دىڭ ۋاكىلەتتى تۇلعاسى، قازۇجعا اكادەميگى ا.ا. زەينۋللين اشتى. ءسوز بارىسىندا «EXPO–2017» ماقساتى مەن مىندەتتەرىن، سونىمەن قاتار كورمە جۇمىسىنا دايىندىق كەزىندە ىسكە اسىرىلاتىن جوبالار تۋرالى ايتتى. جوبالاردىڭ ءبىرى – «Online EXPO-2017» حالىقارالىق بايقاۋىنا ۇسىنىلدى، بۇل بايقاۋ ەكسپو-2017-عا يننوۆاسيالىق ىرىكتەۋ مەن جوبالار ءۇشىن جاسالىنعان. ىرىكتەۋ قورىتىندىسى بويىنشا 2015، 2016، 2017 جىلدارى بولاشاق ەنەرگياسى فورۋمى شەڭبەرىندە شاعىن كورمە وتكىزىلەتىن بولادى. ەكىنشى جوبا – جوسپارلانعان جانە ۇسىنىلعان ءىس-شارالاردا تاقىرىپتارى كەڭىنەن تالقىلاناتىن «G-Global – EXPO» ونلاين فورۋمى.
![پوليتەح.010](/uploads/images/20240128164151618.jpg)
ا.ا.. زەينۋللين: «كورمە مىندەتى – ەنەرگيا قولدانىسى دەنساۋلىعىمىز بەن قورشاعان ورتانىڭ قاۋىپسىزدىگىنە ءتيىمدى اسەرى بار جاڭا، تۇراقتى ەنەرگيا كوزدەرىن دامىتۋعا قوعام نازارىن اۋدارۋ، الەۋمەتتىك-ەكونوميكالىق دامۋىن جەدەلدەتۋ بولىپ تابىلادى. بۇل كورمە بىزگە ەرتەڭ بولاتىن ۇلكەن سىن، ۇلكەن ابىروي. ءبىز ۇجىمنىڭ بىلىكتى ماماندارىمەن بولاشاق ەنەرگياسىن جاسادىق. ۋنيۆەرسيتەتىمىزدە عىلىمي-تەحنيكالىق باعدارلامالار جۇزەگە اسىرىلۋدا، وسى باعدارلامالاردىڭ ىسكە اسۋىنا جاس عالىمدار ۇلەس قوسۋى كەرەك. ەكسپو كورمەسىنە لايىقتى جوبالاردى ۇسىنۋىمىز قاجەت. حالىقارالىق تاجىريبە بويىنشا ەكسپو كورمەسى سياقتى اۋقىمدى ءىس-شارالاردى وتكىزۋ تۋريزم سالاسىن عانا ەمەس، سونىمەن بىرگە، ەكونوميكانىڭ باسقا دا سالالارىن دامىتۋعا ىقپالىن تيگىزەدى. ستاتيستيكاعا سۇيەنسەك، 1 تۋريست ءوزى كەلگەن ەل اۋماعىندا 1،5 مىڭ دوللارعا جۋىق قارجىنى جۇمساپ، شامامەن 6-12 ادامدى جۇمىسپەن قامتاماسىز ەتەدى. وسىلايشا كورمەنى وتكىزۋدەن الىناتىن ناتيجە وراسان زور»، – دەدى.
بولاشاقتىڭ نەگىزگى وقيعاسىنا قازۇتزۋ-دىڭ جاس عالىمدارى قاتىسپاۋى مۇمكىن ەمەس. دوڭگەلەك ۇستەل وتىرىسىندا، ولار وزدەرىنىڭ جاسىل ەكونوميكا، بالامالى ەنەرگيا كوزدەرىن دامىتۋ مەن روبوتوتەحنيكا، عارىش سالالارىنداعى يننوۆاسيالىق شەشىمدەرگە ارنالعان عىلىمي زەرتتەۋلەرىن ۇسىنۋعا بىرەگەي مۇمكىندىكتەرگە يە بولدى.
اتالمىش وتىرىستا قازۇتزۋ-دىڭ جاستار ۇيىمدارى كوميتەتىنىڭ ءتوراعاسى ەركىنوۆا ءمادينانىڭ «بولاشاق ەنەرگياسى قازۇتزۋ جاس عالىمدارىنىڭ قولىندا»، «فيزيكا-تەحنيكالىق ينستيتۋتى» زەرتحاناسىنىڭ مەڭگەرۋشىسى نۇرلان ءتوقمولديننىڭ «كۇن ەلەمەنتتەرى مەن مودۋلدەرىنىڭ تىك ينتەگراسيالانعان ءوندىرىسى»، قولدانبالى ەكولوگيا كافەدراسىنىڭ وقىتۋشىسى وسەربايەۆا اسەلدىڭ «بالامالى ەنەرگيا كوزدەرى»، ءبجمجموت كافەدراسىنىڭ دوكتورانتى ىبىرايىمقۇل دارحاننىڭ «پوليمەر جانە ورگانيكالىق زاتتاردىڭ نەگىزىندە يىلگىش كۇن باتارەيالارىنىڭ ۇلگىلەرى» اتتى باياندامالارى ۇسىنىلدى.
«روبوتتىتەحنيكا جانە اۆتوماتيكانىڭ اقپاراتتى قۇرالدارى» كافەدراسىنىڭ اعا وقىتۋشىسى رۋسلان ۇتەبايەۆ «الماتى قالاسىنداعى ەلەكتروموبيلدەرگە ارنالعان زاريادتاۋ ستانسيالارىن باسقارۋ جۇيەلەرىن وڭدەۋ جانە زەرتتەۋ» جوباسىن ۇسىندى.
باياندامالار بارىسىندا باسقا دا عىلىمي زەرتتەۋلەر تىڭدالدى. جينالىس سوڭىنداعى تالقىلاۋدا ەكسپو-2017 كورمەسىنە ۇسىنىلعان ۇسىنىستار مەن پىكىرلەر تۋرالى سىندارلى اڭگىمەلەر قوزعالدى.
ب.ەدىلبايەۆ، ق.ساتبايەۆ اتىنداعى قازۇتزۋ اقپاراتتىق-اناليتيكالىق ورتالىعىنىڭ ديرەكتورى