الماتى قالالىق سوتىنا «مەركۋر تاۋەرس» تۇرعىن ءۇي كەشەنى كۇزەتشىسىنىڭ ولىمىنە قاتىستى ۇكىمگە اپەللياسيالىق شاعىمدار ءتۇستى، دەپ حابارلايدى Dalanews.kz.
نە بولدى؟
2024 جىلدىڭ ناۋرىزىندا 45 جاستاعى الماتىلىق تۇرعىن «مەركۋر تاۋەرس» كەشەنىنىڭ كۇزەتشىسىن جول تالعامايتىن كولىكپەن بىرنەشە رەت قاعىپ وتكەن، كەيىن ونىڭ باسىنان سەكىرگەن. وقيعا بەينەباقىلاۋ كامەرالارىنا ءتۇسىپ قالعان. كۇزەتشى اۋىر حالدە اۋرۋحاناعا جەتكىزىلىپ، سول جەردە كوز جۇمدى.
قاندى وقيعاعا كۇزەتشىنىڭ اشۋلى ەر ادامدى تۇرعىن ءۇي اۋلاسىنان اتا-اناسىنىڭ ءوتىنىشى بويىنشا شىعارماي قويۋى سەبەپ بولعان. كورشىلەردىڭ ايتۋىنشا، كۇزەتشىنى قاتىگەزدىكپەن ولتىرگەن ازامات بىرنەشە جىلدان بەرى وسى كەشەندە اتا-اناسىمەن بىرگە تۇرعان. ول ەسىرتكىگە تاۋەلدى بولعان جانە كورشىلەردى ۇنەمى ۇرەيدە ۇستاعان كورىنەدى.
باق-تىڭ حابارلاۋىنشا، كۇدىكتىنىڭ اكەسى - بۇرىنعى دەپۋتات. بۇعان دەيىن ول تالدىقورعان قالاسىنىڭ پروكۋرورىنىڭ اعا كومەكشىسى قىزمەتىن اتقارعان بولۋى مۇمكىن.
ۇكىم
2025 جىلعى 9 ساۋىردە سوت ايىپتالۋشىنى ق ر قىلمىستىق كودەكسىنىڭ 99-بابى 2-بولىگىنىڭ 5-تارماعى («ايرىقشا قاتىگەزدىكپەن جاسالعان ادام ءولتىرۋ») جانە 147-بابى 5-بولىگى («جەكە ومىرگە قول سۇعىلماۋشىلىقتى جانە جەكە دەرەكتەر تۋرالى زاڭنامانى بۇزۋ») بويىنشا قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىپ، 22 جىلعا باس بوستاندىعىنان ايىردى.
سوت ايىپتالۋشىدان جابىرلەنۋشىلەردىڭ پايداسىنا 24 ميلليون تەڭگە جانە وكىلدىك قىزمەتتەر ءۇشىن 1 ميلليون 150 مىڭ تەڭگە ءوندىرىپ بەردى.
اپەللياسيالىق شاعىمدار
اپەللياسيالىق شاعىمدى جابىرلەنۋشى تاراپ - مارقۇمنىڭ جۇبايى اسەم مولداحۇنوۆا ءتۇسىردى. جابىرلەنۋشىنىڭ ادۆوكاتى ارمان ءشارىپوۆ Tengrinews.kz تىلشىسىنە بەرگەن سۇحباتىندا ايىپتالۋشىعا تاعايىندالعان جازا تىم جەڭىل دەپ ەسەپتەيتىندەرىن ايتتى.
"ءبىز، جابىرلەنۋشى تاراپ، ءبىرىنشى ساتىداعى سوتتىڭ شەشىمىمەن كەلىسپەيمىز جانە بۇل جازانى تىم جەڭىل دەپ سانايمىز. ايىپتالۋشىعا قولدانىلعان باپ ءومىر بويىنا باس بوستاندىعىنان ايىرۋ جازاسىن كوزدەيدى. سوندىقتان ءبىز بۇل جازانى وزگەرتىپ، ەڭ جوعارعى جازامەن باس بوستاندىعىنان ايىرۋدى سۇرايمىز. سونىمەن قاتار، مورالدىق زيان بويىنشا شەشىممەن دە كەلىسپەيمىز، ويتكەنى ءبىزدىڭ تالابىمىز ءىشىنارا عانا قاناعاتتاندىرىلدى. ءبىز ءوز تالاپ-ارىزىمىزدىڭ تولىق كولەمدە قاناعاتتاندىرىلۋىن سۇرايمىز"، – دەدى ءشارىپوۆ.
ونىڭ ايتۋىنشا، جابىرلەنۋشى تاراپ 100 ميلليون تەڭگە كولەمىندە وتەماقى تالاپ ەتكەن، الايدا سوت تەك 20 ميلليون تەڭگەنى عانا ماقۇلداعان.
ءشارىپوۆتىڭ ايتۋىنشا، ايىپتالۋشى تاراپ تا اپەللياسيالىق شاعىم بەرگەن — ولاردىڭ قورعاۋشىسى جازا تىم قاتال دەپ ساناپ، ونى جەڭىلدەتۋدى سۇرايدى.
اپەللياسيالىق شاعىمداردى قاراۋ 29 شىلدەدە ءوتۋى ءتيىس ەدى. الايدا ايىپتالۋشىنى پروسەستە قاشىقتان قوسۋ مۇمكىن بولماعاندىقتان، سوت كەيىنگە شەگەرىلدى.
