الماتىدا يابلوچكوۆ كوشەسىندەگى ەسكى ۇيلەردىڭ تۇرعىندارى اكىمنەن رەنوۆاسيا مەن قونىس اۋدارۋ ۇدەرىسىن تەزدەتۋدى ءوتىندى، دەپ حابارلايدى Dalanews.kz.
1953-1954 جىلدارى سالىنعان №1 جانە №3 قاڭقالى-قامىستى ۇيلەرگە وسى كۇنگە دەيىن بىردە-بىر رەت كۇردەلى جوندەۋ جۇرگىزىلمەگەن. قابىرعا مەن توبەنىڭ اراسىنان جارىقتار پايدا بولىپ، ەدەنى شوگىپ، شاتىرى ساۋىلداعان. 2017-2018 جىلدارى قازقسعزي بۇل عيماراتتاردى اپاتتى دەپ تانىپ، قونىس اۋدارۋ جانە ءسۇرۋ قاجەت دەگەن قورىتىندى جاساعان.
اكىم دارحان ساتىبالدى ەسكى ۇيلەردى ءسۇرۋ كەزىندە تۇرعىنداردىڭ باسپاناسىز قالماۋى اسا ماڭىزدى ەكەنىن اتاپ ءوتتى.
“بارلىق شەشىم زاڭ اياسىندا قابىلدانۋى ءتيىس. ەرتەڭ پروكۋراتۋرا داۋلاماۋى ءۇشىن حاتتامالاردى تەكسەرەمىز. ەڭ باستىسى – حالىققا قولايلى ءارى بىزگە دە العا جىلجۋعا مۇمكىندىك بەرەتىن نۇسقانى تابۋ”، – دەدى ول.
تۇرعىنداردىڭ ايتۋىنشا، ولار ءۇشىن قونىس اۋداراتىن اۋداننىڭ قايسى بولاتىنى ماڭىزدى ەمەس. ماسەلەن، ناۋرىزباي اۋدانىندا دايىن پاتەرلەر بار ەكەنى ايتىلدى.
