Almatyda Iablochkov kóshesindegi eski úilerdiń turǵyndary ákimnen renovatsiia men qonys aýdarý úderisin tezdetýdi ótindi, dep habarlaidy Dalanews.kz.
1953-1954 jyldary salynǵan №1 jáne №3 qańqaly-qamysty úilerge osy kúnge deiin birde-bir ret kúrdeli jóndeý júrgizilmegen. Qabyrǵa men tóbeniń arasynan jaryqtar paida bolyp, edeni shógip, shatyry saýyldaǵan. 2017-2018 jyldary QazQSǴZI bul ǵimarattardy apatty dep tanyp, qonys aýdarý jáne súrý qajet degen qorytyndy jasaǵan.
Ákim Darhan Satybaldy eski úilerdi súrý kezinde turǵyndardyń baspanasyz qalmaýy asa mańyzdy ekenin atap ótti.
“Barlyq sheshim zań aiasynda qabyldanýy tiis. Erteń prokýratýra daýlamaýy úshin hattamalardy tekseremiz. Eń bastysy – halyqqa qolaily ári bizge de alǵa jyljýǵa múmkindik beretin nusqany tabý”, – dedi ol.
Turǵyndardyń aitýynsha, olar úshin qonys aýdaratyn aýdannyń qaisy bolatyny mańyzdy emes. Máselen, Naýryzbai aýdanynda daiyn páterler bar ekeni aityldy.
