سۇحبات بارىسىندا نيە مىرزا «Singer-2017» بايقاۋىنىڭ بەسىنشى كەزەڭىندە ديماشقا نە ءۇشىن «Uptown Funk» ءانىن تاڭداعانى تۋرالى ءوز پىكىرىمەن ءبولىستى.
– كوپتەگەن جانكۇيەرلەر ديماشتىڭ بەسىنشى كەزەڭدەگى ءانى ونىڭ التىنشى ورىنعا سىرعىپ كەتۋىنە سەبەپ بولدى. بۇل ءان ديماشقا ۇيلەسپەيدى دەگەن پىكىر ايتتى. ديماش جاس ءارى تالانتتى ءانشى ەكەنىن بارلىعى مويىنداپ وتىر. مەنىڭشە، ول وسى باسەكەنىڭ شەڭبەرىندە تەك جەڭىس ءۇشىن ءان شىرقاپ، ءوز مۇمكىندىگىن شەكتەپ قويماۋى كەرەك. Singer-2017 بايقاۋى قىتايعا عانا ەمەس، شىعىس ازيانىڭ كوپتەگەن ەلدەرىندە تانىمال. ديماش وسى ساحنادان ءوزىنىڭ مۋزىكاداعى مۇمكىندىگىن ودان ارى قاراي كەڭەيتە بەرۋى ءتيىس. سوندىقتان وزىنە ۇناعان ءاندى تاڭداپ، ونەردەگى جاڭا باعىتتارىن دا اشىپ كورۋگە تىرىستىق، – دەدى نيە مىرزا.
– ءار كەزەڭدە ايتاتىن ءاننىڭ ارانجيروۆكاسىن دايىنداۋعا ءوزى تولىقتاي قاتىسادى جانە جوعارى تالاپتار قويادى. جاس بولسا دا ءار ءتۇرلى حالىقارالىق بايقاۋلارعا قاتىسىپ، جەڭىمپاز اتانعان تاجىريبەلى ءانشى. مۋزىكالىق ءبىلىمى دە وتە جوعارى دەڭگەيدە. ال ديماشتى تەك جوعارى داۋىستا ءان ايتا بەرەدى دەپ سىنايتىندارعا ايتارىم، جوعارى داۋىستا ءان سالۋ ونىڭ تۋا بىتكەن تالانتى، جانە دە ونىڭ داۋىسىنىڭ مۇمكىندىگى وتە زور، – دەدى باس پروديۋسەر.
نيە مىرزانىڭ ايتۋىنا قاراعاندا، پروديۋسەرلىك ورتالىق ديماش ارقىلى قىتايلىق كورەرمەندەر مەن جاستاردىڭ مۋزىكاعا جانە جۇلدىزدارعا دەگەن تۇسىنىگىن وزگەرتۋگە تىرىسقان.
ديماشتىڭ وزگەشە ءستيلى قىتايلىق جاستاردى تەك بەت-الپەتكە كوڭىل بولەتىن كورەيالىق مۋزىكا مادەنيەتىنەن الىستاتۋعا سەپتىگىن تيگىزگەن. «جىل سوڭىنا دەيىن ديماشتىڭ جەكە ءان البومى جارىق كورەدى. ودان كەيىن جەكەلەگەن ايماقتاردا جەكە كونسەرتتەر ۇيىمداستىرۋدى جوسپارلاپ وتىرمىز. ءارى قارايعى دامۋ بارىسى قازاقستانداعى وقۋىن اياقتاپ، اعىلشىن تىلىمەن فرانسۋز تىلدەرى دەڭگەيىن جوعارىلاتقاننان كەيىن جاسالادى»، – دەپ نيە مىرزا ديماشتىڭ الداعى جوسپارلارى تۋرالى ءبولىستى.
ايتا كەتەيىك، وتانداسىمىز حۋنان تەلەارناسىنىڭ «Singer-2017» ءان بايقاۋىنىڭ 5 كەزەڭىندە ءساتتى ونەر كورسەتتى. 6-كەزەڭ 25 اقپان كۇنى ەفيردەن كورسەتىلەدى.
دەرەككوزى: قازاقپارات
