Dimash qytai jastaryna qalai yqpal etti?
Suhbat barysynda Nie myrza «Singer-2017» baiqaýynyń besinshi kezeńinde Dimashqa ne úshin «Uptown Funk» ánin tańdaǵany týraly óz pikirimen bólisti.
– Kóptegen jankúierler Dimashtyń besinshi kezeńdegi áni onyń altynshy orynǵa syrǵyp ketýine sebep boldy. Bul án Dimashqa úilespeidi degen pikir aitty. Dimash jas ári talantty ánshi ekenin barlyǵy moiyndap otyr. Menińshe, ol osy básekeniń sheńberinde tek jeńis úshin án shyrqap, óz múmkindigin shektep qoimaýy kerek. Singer-2017 baiqaýy Qytaiǵa ǵana emes, Shyǵys Aziianyń kóptegen elderinde tanymal. Dimash osy sahnadan óziniń mýzykadaǵy múmkindigin odan ary qarai keńeite berýi tiis. Sondyqtan ózine unaǵan ándi tańdap, ónerdegi jańa baǵyttaryn da ashyp kórýge tyrystyq, – dedi Nie myrza.
– Ár kezeńde aitatyn ánniń aranjirovkasyn daiyndaýǵa ózi tolyqtai qatysady jáne joǵary talaptar qoiady. Jas bolsa da ár túrli halyqaralyq baiqaýlarǵa qatysyp, jeńimpaz atanǵan tájiribeli ánshi. Mýzykalyq bilimi de óte joǵary deńgeide. Al Dimashty tek joǵary daýysta án aita beredi dep synaityndarǵa aitarym, joǵary daýysta án salý onyń týa bitken talanty, jáne de onyń daýysynyń múmkindigi óte zor, – dedi bas prodiýser.
Nie myrzanyń aitýyna qaraǵanda, prodiýserlik ortalyq Dimash arqyly qytailyq kórermender men jastardyń mýzykaǵa jáne juldyzdarǵa degen túsinigin ózgertýge tyrysqan.
Dimashtyń ózgeshe stili qytailyq jastardy tek bet-álpetke kóńil bóletin koreialyq mýzyka mádenietinen alystatýǵa septigin tigizgen. «Jyl sońyna deiin Dimashtyń jeke án albomy jaryq kóredi. Odan keiin jekelegen aimaqtarda jeke kontsertter uiymdastyrýdy josparlap otyrmyz. Ári qaraiǵy damý barysy Qazaqstandaǵy oqýyn aiaqtap, aǵylshyn tilimen frantsýz tilderi deńgeiin joǵarylatqannan keiin jasalady», – dep Nie myrza Dimashtyń aldaǵy josparlary týraly bólisti.
Aita keteiik, otandasymyz Hýnan telearnasynyń «Singer-2017» án baiqaýynyń 5 kezeńinde sátti óner kórsetti. 6-kezeń 25 aqpan kúni efirden kórsetiledi.
Derekkózi: Qazaqparat
