بۇل تۋرالى ارنايى پروكۋرورلار قىزمەتىنىڭ باسشىسى ريزابەك وجاروۆ مالىمدەدى. ارنايى پروكۋرورلار قىزمەتى باسشىسىنىڭ ايتۋىنشا، بۇگىندە ۇيىمداسقان قىلمىستىق توپتىڭ 18 مۇشەسى ۇستالعان.
ولاردىڭ ادام ءولتىرۋ، ۇرلىق، توناۋ جانە توناۋ ارەكەتتەرگە قاتىسى بار ەكەنىن العا تارتتى.
– «ديكيي ارمان» دەگەن لاقاپ اتپەن تانىمال ارمان جۇماگەلدييەۆ پەن ونىڭ توبىنداعى قارۋلانعان ادامدار كوشەدە كەزدەيسوق ءوتىپ بارا جاتقان ادامداردىڭ اراسىنان 24 بەيبىت تۇرعىندى ۇرلاپ، كۇشتەپ ۇستاعان. ولاردى الدىمەن ءبىر جەردەن ەكىنشى جەرگە اپارىپ، ۇرىپ-سوعىپ، ناتيجەسىندە ءبىر ادام قازا تاپقان. سونىمەن قاتار، قاراقشىلار بۇعان دەيىن 12ء-شى قالالىق اۋرۋحانادا قاتتى سوققىعا جىعىلعان پوليسەيدىڭ قىزمەتتىك قارۋىن الىپ كەتكەن، – دەدى ريزابەك وجاروۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
ونىڭ ايتۋىنشا، اتالعان فاكت بويىنشا قىلمىستىق ءىس تەرگەلۋدە.
– الەۋمەتتىك جەلىلەردە جۇماگەلدييەۆ بوساتىلدى نەمەسە بەلگىسىز جاققا جەتكىزىلدى دەگەن ءتۇرلى بولجامدار مەن جالعان اقپاراتتار تارالىپ جاتىر. ءىس قوسىمشا تەرگەۋ ءۇشىن ارنايى پروكۋرورلارعا جىبەرىلدى. ءبىز ونى ۇقك ۋاقىتشا ۇستاۋ يزولياتورىنا اۋىستىردىق. ول سوندا قاماۋدا وتىر، – دەپ قوستى ارنايى پروكۋرورلار قىزمەتىنىڭ باسشىسى.
