قاڭتار وقيعاسىنان كەيىن جاپپاي تارتىپسىزدىكتەردى ۇيىمداستىردى دەپ ايىپتالعان پولكوۆنيك رۋسلان ىسقاقوۆ «نوۆايا گازەتاعا» شىن مانىندە نە بولعانىن ايتتى. ول ديكيي ارمان شىن مانىندە سامات ءابىشتىڭ بۇيرىعىن ورىنداعانىنا سەنىمدى، - دەپ حابارلايدى Dalanews.kz.

رۋسلان ىسقاقوۆ قاڭتار وقيعاسىنا بايلانىستى وتكەن سوت وتىرىستارىنىڭ بىرىندە ول سامات ءابىشتىڭ بۇيرىعىن ورىنداعانىن ايتقان بولاتىن.  ءابىشتىڭ بۇيرىعىمەن ىسقاقوۆ ارمان جۇماگەلدييەۆ – ديكيي ارماندى بۇل ىسكە تارتقان كورىنەدى. جۇماگەلدييەۆ قىلمىس الەمنە قاتىسى بار جانە نازاربايەۆتار ايۋلەتىنىڭ تاپسىرماسىن ورىنداۋشى رەتىندە بەلگىلى.

رۋسلان ىسقاقوۆ بيلىككە جانە ب ا ق وكىلدەرىنە اشىق حات جازعان. حاتىندا ول «شىن مانىندە ميتينگتى 2019 جىلى ەلدى باسقارعان پرەزيدەنتپەن ەسەپ بەرىپ، ءوز ىس-ارەكەتتەرىن ۇيلەستىرەتىن ۇكىمەت پەن ءتيىستى مينيسترلىك تۋدىردى» دەيدى.

«مەملەكەتتىك كوميسسيا وتىرىسىندا ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ورىنباسارى ەرعوجين گاز باعاسىن باستاپقى باعاعا دەيىن تومەندەتۋدى ۇسىنسا، بيلىك وكىلدەرى ونى قولدامادى، سەبەبى بۇل ارقىلى مەملەكەت ءوزىنىڭ السىزدىگىن كورسەتەدى دەپ ءتۇسىندىردى»، - دەيدى ىسقاقوۆ.

وسىلايشا ەلدە حاوس باستالعان. سول كەزدەگى ورتالىق اپپاراتتى جەدەل باسقارۋ ۇلتتىق قاۋىپسىزدىك كوميتەتىنىڭ ءبىرىنشى ورىنباسارى بولعان سامات ابىشكە جۇكتەلگەن. رۋسلان ىسقاقوۆتىڭ سوزىنشە، 2022 جىلى 5 قاڭتاردا سامات ءابىش «ارمان جۇماگەلدييەۆتىڭ كومەگىنە جۇگىنۋ كەرەك» دەپ بۇيرىق بەرگەن ەكەن. سامات ءابىش ديكيي ارماننان الماتى اكىمدىگىندە قالىپ قويعان پوليسەيلەردى قۇتقارىپ، رەسپۋبليكا الاڭىنداعى جاعدايدى باقىلاۋعا الۋدى سۇراعان كورىنەدى.

«مەنىڭ ءوتىنىشىم بويىنشا جانە سامات ءابىشتىڭ بۇيرىعىن ورىنداۋ ءۇشىن جۇماگەلدييەۆ رەسپۋبليكا الاڭىنا شىعىپ، كوشەگە شىققانداردىڭ ءبىر بولىگىن الىپ كەتتى. ول قولىنان كەلگەننىڭ ءبارىن جاسادى، ءبىراق زاردابى وزىنە دە ءتيدى: ارمانعا قان توگىس بولعانىن قالايتىندار شابۋىل جاسادى. ەندى مەن ءابىشتىڭ بۇيرىعىن سول كەزدەگى جاعدايعا قاراپ، ورىندى ءارى زاڭدى بولدى دەپ ەسەپتەيمىن. بۇيرىقتى ورىنداۋ قاجەتتىگىنە كۇمانىم بولعان جوق»، - دەيدى ىسقاقوۆ.

سونىمەن قاتار، ىسقاقوۆ ءابىش بۇيرىعىن جوعارى جاقپەن كەلىسىپ بەرىپ وتىر دەپ ويلاعانىن ايتادى.  

قالادا حاوس بولىپ جاتقان كەزدە  الماتى پروكۋرورى بەرىك جۇيرىكتايەۆ اتا-اناسىنىڭ ۇيىنە جۇماگەلدييەۆتىڭ جىگىتتەرىن جىبەرۋدى سۇراعان ەكەن. رۋسلان ىسقاقوۆ ديكيي ارمانعا ءوتىنىش جاساپ، جىگىتتەرىن جىبەرەدى. ارتىنشا جۇيرىكتايەۆ ارمان جۇماگەلدييەۆتى اۋرۋحانالاردى كۇزەتۋگە زاڭسىز جالداعان دەپ ايىپتاپ، ىسقاقوۆتى قاماۋعا الۋعا رۇقسات بەرگەن ەكەن.

رۋسلان ىسقاقوۆتىڭ سوزىنشە، «ابسۋرد» مۇنىمەن بىتپەگەن.

«ءىىم ەكس ءمينيسترى ەرلان تۇرعىمبايەۆ شىنايى فاكتىلەردى بۇرمالاپ، ءوز جاۋاپكەرشىلىگىنەن جالتارىپ، جاپپاي تارتىپسىزدىكتەردى ۇيىمداستىرۋشى رەتىندە ارمان جۇماگەلدييەۆتى كورسەتتى. بۇل ويعا قونىمسىز جانە مۇمكىن ەمەس نارسە: ول قازاقستانعا 2021 جىلدىڭ 17 جەلتوقسانىندا قىزىنىڭ دەنساۋلىق جاعدايىنا بايلانىستى عانا كەلسە، ول نەنى، قالاي ۇيىمداستىرىپ ۇلگەرەدى؟ ودان بولەك، 2017-2021 جىلدارى قازاقستانعا ءار كەلگەنىن ىىم-مەن ماقۇلداپ وتىراتىن. سوڭعى كەلگەنىن دە جۇماگەلدييەۆ تۇرعىمبايەۆپەن ماقۇلداپ، وعان دالەل رەتىندە 2021 جىلى 17 جەلتوقساندا سويلەسكەندەرىن كورسەتۋگە بولادى»، - دەيدى پولكوۆنيك رۋسلان ىسقاقوۆ.