قازاق حاندىعىنىڭ 550 جىلدىعىن تويلاۋ اياسىندا جانە قۇربان ايتقا وراي ميچۋرين بالالار ۇيىندە «دوستىق، تۋىسقاندىق جانە بىرلىكتىڭ بەلگىسى» اتتى مەرەكەلىك شارا ءوتتى. قايىرىمدىلىق اكسيانىڭ ۇيىمداستىرۋشىلارى – پاۆلودار قالاسى دارىندى ەر بالالارعا ارنالعان قازاق-تۇرىك ليسەيىنىڭ 8 «ا» سىنىپ جەتەكشىسى وسمان دەميرەل جانە اتا-انالار كوميتەتى. مەرەكە ءوسىپ كەلە جاتقان جاس ۇرپاقتاردىڭ پاتريوتتىق سەزىمىن دامىتۋعا، وتباسىلىق قۇندىلىقتى ناسيحاتتاۋعا جانە جەتىم بالالارعا قايىرىمدىلىق كومەگىن كورسەتۋگە باعىتتالعان.
بالالار ءۇيىنىڭ تاربيەلەنۋشىلەرى مەكەمە ديرەكتورى گۇلميرا باشيروۆانىڭ جەتەكشىلىگىمەن كەلگەن قوناقتارعا وزدەرىنىڭ تۇرعان ۇيلەرىن كورسەتىپ، ەكسكۋرسيا وتكىزدى. ولكەتانۋ ۇيىرمەسىنىڭ مۇشەلەرى چەرنورەسك بالالار ءۇيىنىڭ 70 جىلدىعىنا جينالعان ماتەريالدارعا باي مۇراجايمەن تانىستىردى.
تانىسىپ بولعان سوڭ، بالالار ءۇيىنىڭ تاربيەلەنۋشىلەرى مەن ليسەيلىكتەردىڭ بىرىككەن كونسەرتى ءوتتى. قازاق-تۇرىك ليسەيىنىڭ 8 «ا» سىنىپ وقۋشىلارى وزدەرىنىڭ ءبىلىمدى ەكەنىن كورسەتۋمەن قاتار، ۇلتتىق اسپاپتاردا وينايتىندىقتارىن كورسەتە الدى. جانە ولاردىڭ تاربيەشىلەرى قانات ەرتايەۆ ۇيرەتكەن «حالاي» تۇرىك بيىمەن زالدى كوڭىلدەندىردى.
ءوز كەزەگىنە قوناقتاردىڭ الدىندا «ستەپس» حورەوگرافيالىق توبى مەن رەسپۋبليكالىق «تاڭشولپان» بايقاۋىنىڭ لاۋرەاتى داۋلەت احانوۆ، كەرەمەت بيىمەن، «جاسا، قازاقستان» انىمەن قارسى الدى.
قتل-دىڭ اتا-انالارى بارلىق بالالارعا ويىن-ساۋىق باعدارلاماسىن سىيعا تارتتى. بۇل ءانشى ماۋسىم مەن يلليۋزيونيست-فوكۋسشى ەلداردىڭ كورسەتىلىمى ەدى. ولار مەرەكەگە جارقىن بوياۋلار قوسىپ، كورەرمەندەردى وزدەرىنىڭ فوكۋستارىمەن، قويىلىمدارىمەن تاڭعالدىرىپ، عاجايىپ ءبىر دۇنيەگە ەنگىزگەندەي بولدى.
شارا وتباسى كۇنىنە ارنالعان «اكەم، شەشەم جانە مەن – سپورتتىق وتباسى» ەستافەتاسىمەن جالعاستى. بالالار ءۇيىنىڭ ستاديونىندا تاربيەشىلەر، اتا-انالار جانە بالالار جارىسىپ، كوڭىلدى توپتىق رۋحتى، ءوزارا كومەك كورسەتۋدى، جانۇيا بىرلىگىن جانە جەڭۋدى الدىنا قويۋ سياقتى قاسيەتتەردى كورسەتە ءبىلدى. تەپە-تەڭ تۇسكەن سايىستا دوستىق جەڭدى.
اتالعان مەرەكەنىڭ قورىتىندىسى بولىپ، بالالار ءۇيىنىڭ اسحاناسىندا ليسەيلىكتەردىڭ انالارى دايىنداعان مول داستارقان جايىلدى. ۇستەلدە داستارقان مازىرىندە قولدان جاسالعان قازاق ۇلتتىق تاعامدارى، تاتتى-دامدىلەردىڭ ءتۇر-تۇرى بولدى. ۇلى مەيرامدار قارساڭىندا، ۇلكەن وتباسى بولىپ جينالعان باي داستارقاننىڭ باسىندا ءاردايىم بەيبىتشىلىك، قۇت-بەرەكە، دوستىق جانە بىرلىك بولسىن دەگەن تىلەكتەر ايتىلدى.
جازيرا سىزدىقوۆا (اتا-انا)
