بۇگىنگى جاھاندانۋ زامانىندا ساياسي، الەۋمەتتىك، ەكونوميكالىق تۇراقتىلىق پەن بەيبىتشىلىكتى ساقتاۋ جانە نىعايتۋ ماقساتىنداعى حالىقارالىق دەڭگەيدەگى جيىنداردىڭ ءجيى ۇيىمداستىرىلۋ كەرەكتىگىن الەمدىك ساياسي جاعدايلار كورسەتىپ وتىر.

وسى ورايدا الەمدىك ىستەردى ۇيلەستىرۋدە جانە حالىقارالىق قاتىناستاردىڭ كوپپوليارلىق جۇيەسىن نىعايتۋ بويىنشا بۇۇ-نىڭ ماڭىزى زور ەكەنى بەلگىلى.

بۇۇ-نىڭ وتكەن 78-سەسسياسى «سەنىمدىلىكتى قالپىنا كەلتىرۋ جانە جاھاندىق ىنتىماقتاستىقتى جانداندىرۋ: 2030 جىلعا دەيىن كۇن تارتىبىندە بەيبىتشىلىك، وركەندەۋ، دامۋ جانە بارلىعىنا بىردەي تۇراقتىلىق ءۇشىن تۇجىرىمدالعان ماقساتتارىنا جەتۋ بويىنشا ارەكەتتەردى جەدەلدەتۋ» دەگەن تاقىرىپپەن الەم پرەزيدەنتتەرىن ديالوگقا شاقىردى.

الەمدىك دەڭگەيدەگى ماڭىزدى جيىندا ءسوز سويلەگەن پرەزيدەنتىمىز ق.توقايەۆ حالىقارالىق داۋلاردى جانە گەوساياسي قاقتىعىستاردى ديپلوماتيالىق جولمەن شەشۋگە شاقىرىپ «بەيبىتشىلىك تەك قارۋ-جاراققا تىيىم سالۋمەن نەمەسە دەكلاراسياعا قول قويۋمەن عانا ەمەس، بەيبىتشىلىك مادەنيەتىن قالىپتاستىرۋدا ءدىنارالىق جانە كونفەسسياارالىق ديالوگ اسا ماڭىزدى» ەكەنىن اتاپ ءوتتى.

سونىمەن قاتار مەملەكەت باسشىسى «جۋىردا قاسيەتتى كىتاپتارعا قۇرمەتسىزدىك تانىتۋ اكتىلەرى بولدى. ءبىز وسى جاعدايعا الاڭداۋشىلىق بىلدىرەمىز.

يسلامعا جانە باسقا دا دىندەرگە قاتىستى جاسالعان مۇنداي تاعىلىق ارەكەتتەردەن ەركىندىكتىڭ، ءسوز بوستاندىعىنىڭ جانە دەموكراتيانىڭ نىشانى بىلىنبەيدى. قۇران سەكىلدى قاسيەتتى كىتاپتاردىڭ ءبارى ۆانداليزمنەن قۇقىقتىق تۇرعىدا قورعالۋعا ءتيىس» دەپ، مۇنداي ارەكەتتەر دەموكراتيانىڭ بەلگىسى ەمەس ەكەندىگىن اشىق ايتىپ، قوعامداعى ءدىني توزىمدىلىك بەيبىتشىلىك پەن ءوزارا قۇرمەت قاعيداتتارىنا نەگىزدەلۋى كەرەك دەپ حالىقارالىق وتىرىستا مەملەكەتىمىزدىڭ پوزيسياسىن تاعى دا ايقىنداپ بەردى.

وسى ورايدا، استانادا وتەتىن الەمدىك جانە ءداستۇرلى دىندەر كوشباسشىلارى سەزىنىڭ ەلەۋلى ءرولىن ماقتان تۇتاتىنىن ايتتى. الەمدىك جانە ءداستۇرلى دىندەر ليدەرلەرى سەزىنىڭ نەگىزگى جۇمىس ورگانى بولىپ تابىلاتىن حاتشىلىعى كونفەسسياارالىق جانە وركەنيەتارالىق ديالوگ ماسەلەلەرى بويىنشا الەمدىك دىندەر ليدەرلەرىنىڭ وكىلدەرىمەن جىل سايىن باسقوسۋ ۇيىمداستىرادى. ءوزىنىڭ كەزەكتى جيىنىن اعىمداعى جىلدىڭ قازان ايىنا وتكىزگەلى وتىرعان حاتشىلىق مادەنيەتتەر مەن دىندەر اراسىنداعى جاھاندىق ديالوگتى جانە حالىقارالىق تالقىلاۋلاردى ىلگەرىلەتۋگە مۇمكىندىك جاسايدى.

ءبىرالى ەلميرا اتيعوللا قىزى، كونفەسسياارالىق جانە وركەنيەتارالىق
ديالوگتى دامىتۋ جونىندەگى ن.نازاربايەۆ ورتالىعىنىڭ ءدىنتانۋ ساراپتاماسى دەپارتامەنتىنىڭ ديرەكتورى