سەنات دەپۋتاتتارى اۋىل شارۋاشىلىعىن قارجىلاندىرۋ باعدارلامالارىنا قاتىستى ماسەلە كوتەرىپ، ۇكىمەتكە ساۋال جولدادى، دەپ حابارلايدى Dala News.

دەپۋتاتتاردىڭ ايتۋىنشا، شىمكەنت قالاسىندا اۋىل شارۋاشىلىعى سۋبەكتىلەرى مەملەكەتتىك قولداۋ شارالارىنا تولىق قول جەتكىزە الماي وتىر. ماسەلە «اگرارلىق نەسيە كورپوراسياسى» ارقىلى جۇزەگە اسىرىلاتىن «بەرەكە» جانە «يگىلىك» باعدارلامالارىنا بايلانىستى.

ساۋالدا اتاپ وتىلگەندەي، قولدانىستاعى تالاپتار قالالىق فورماتتاعى شارۋاشىلىقتارعا سايكەس كەلمەيدى.

«باعدارلاما شارتتارىنا سايكەس، اسىلتۇقىمدى ءىرى قارا مال ساتىپ الۋ ءۇشىن نەسيە الۋشىنىڭ يەلىگىندە بەلگىلى ءبىر كولەمدە اۋىل شارۋاشىلىعى ماقساتىنداعى جەر بولۋى ءتيىس. ءبىر باس مالعا كەمىندە ءبىر گەكتار ەگىستىك نەمەسە ءۇش گەكتار جايىلىم جەر قاجەت. بۇل تالاپ اۋىلدىق جەرلەر ءۇشىن قولايلى بولعانىمەن، شىمكەنت قالاسىنىڭ ەرەكشەلىكتەرىنە ساي كەلمەيدى»، – دەلىنگەن ساۋالدا.

دەپۋتاتتار قالادا اۋىل شارۋاشىلىعى الەۋەتى جوعارى ەكەنىن اتاپ ءوتتى.

«شىمكەنتتىڭ جالپى اۋماعى شامامەن 116 مىڭ گەكتاردى قۇرايدى، ونىڭ جارتىسىنا جۋىعى اۋىل شارۋاشىلىعى ماقساتىندا پايدالانىلادى. قالادا 16،5 مىڭ باسقا ارنالعان 8 بورداقىلاۋ الاڭى جۇمىس ىستەيدى. جىل سايىن 700 مىڭ توننا ءسۇت جانە 8 مىڭ توننا ەت وندىرىلەدى. الايدا بۇل كولەم ميلليوننان اساتىن حالىقتىڭ سۇرانىسىن تولىق قامتاماسىز ەتە المايدى»، – دەدى ولار.

ماسەلەن، ءسۇت ونىمدەرى بويىنشا قامتۋ دەڭگەيى 30–35 پايىزدى، ال ەت ونىمدەرى بويىنشا نەبارى 12 پايىزدى قۇرايدى. سونىمەن قاتار قالاداعى ءسۇت فەرمالارى مەن بورداقىلاۋ الاڭدارىنىڭ ۇشتەن ەكىسى بوس تۇر.

ساۋالدا ناقتى ينۆەستورلاردىڭ دا قيىندىققا تاپ بولىپ وتىرعانى ايتىلعان.

«جەكە كاسىپكەر ە. نازاروۆ ەۋروپادان 2،5 مىڭ باس اسىلتۇقىمدى ءىرى قارا ساتىپ الۋدى جوسپارلاپ وتىر. سونىمەن قاتار “قاراسۋ” شارۋا قوجالىعى 1200 باسقا، ال “تۇران اگروپرودۋكت” كووپەراتيۆى 1500 باسقا ارنالعان ءسۇت فەرماسىن قۇرۋ جوبالارىن ۇسىنعان. الايدا ولار قولدانىستاعى تالاپتارعا بايلانىستى قارجىلاندىرۋعا قول جەتكىزە الماي وتىر»، – دەلىنگەن قۇجاتتا.

وسىعان بايلانىستى دەپۋتاتتار ءبىرقاتار ۇسىنىس ايتتى. اتاپ ايتقاندا، رەسپۋبليكالىق ماڭىزى بار قالالار ءۇشىن جەر تالاپتارىن جەڭىلدەتۋ، جالعا الىنعان جەرلەر مەن جەمشوپ كەلىسىمشارتتارىن بالاما رەتىندە تانۋ، قالالىق اگروونەركاسىپكە بەيىمدەلگەن قارجىلاندىرۋ باعدارلامالارىن ازىرلەۋ جانە شىمكەنتتىڭ اۋىل شارۋاشىلىعى الەۋەتىن دامىتۋعا قوسىمشا قولداۋ كورسەتۋ ۇسىنىلدى.

دەپۋتاتتار بۇل شارالار اۋىل شارۋاشىلىعى ءوندىرىسىن دامىتۋعا، ينۆەستيسيا تارتۋعا جانە حالىقتى ازىق-تۇلىكپەن قامتاماسىز ەتۋگە وڭ اسەر ەتەتىنىن اتاپ ءوتتى.