Senat depýtattary aýyl sharýashylyǵyn qarjylandyrý baǵdarlamalaryna qatysty másele kóterip, Úkimetke saýal joldady, dep habarlaidy Dala News.
Depýtattardyń aitýynsha, Shymkent qalasynda aýyl sharýashylyǵy sýbektileri memlekettik qoldaý sharalaryna tolyq qol jetkize almai otyr. Másele «Agrarlyq nesie korporatsiiasy» arqyly júzege asyrylatyn «Bereke» jáne «Igilik» baǵdarlamalaryna bailanysty.
Saýalda atap ótilgendei, qoldanystaǵy talaptar qalalyq formattaǵy sharýashylyqtarǵa sáikes kelmeidi.
«Baǵdarlama sharttaryna sáikes, asyltuqymdy iri qara mal satyp alý úshin nesie alýshynyń ieliginde belgili bir kólemde aýyl sharýashylyǵy maqsatyndaǵy jer bolýy tiis. Bir bas malǵa keminde bir gektar egistik nemese úsh gektar jaiylym jer qajet. Bul talap aýyldyq jerler úshin qolaily bolǵanymen, Shymkent qalasynyń erekshelikterine sai kelmeidi», – delingen saýalda.
Depýtattar qalada aýyl sharýashylyǵy áleýeti joǵary ekenin atap ótti.
«Shymkenttiń jalpy aýmaǵy shamamen 116 myń gektardy quraidy, onyń jartysyna jýyǵy aýyl sharýashylyǵy maqsatynda paidalanylady. Qalada 16,5 myń basqa arnalǵan 8 bordaqylaý alańy jumys isteidi. Jyl saiyn 700 myń tonna sút jáne 8 myń tonna et óndiriledi. Alaida bul kólem millionnan asatyn halyqtyń suranysyn tolyq qamtamasyz ete almaidy», – dedi olar.
Máselen, sút ónimderi boiynsha qamtý deńgeii 30–35 paiyzdy, al et ónimderi boiynsha nebári 12 paiyzdy quraidy. Sonymen qatar qaladaǵy sút fermalary men bordaqylaý alańdarynyń úshten ekisi bos tur.
Saýalda naqty investorlardyń da qiyndyqqa tap bolyp otyrǵany aitylǵan.
«Jeke kásipker E. Nazarov Eýropadan 2,5 myń bas asyltuqymdy iri qara satyp alýdy josparlap otyr. Sonymen qatar “Qarasý” sharýa qojalyǵy 1200 basqa, al “Turan Agroprodýkt” kooperativi 1500 basqa arnalǵan sút fermasyn qurý jobalaryn usynǵan. Alaida olar qoldanystaǵy talaptarǵa bailanysty qarjylandyrýǵa qol jetkize almai otyr», – delingen qujatta.
Osyǵan bailanysty depýtattar birqatar usynys aitty. Atap aitqanda, respýblikalyq mańyzy bar qalalar úshin jer talaptaryn jeńildetý, jalǵa alynǵan jerler men jemshóp kelisimsharttaryn balama retinde taný, qalalyq agroónerkásipke beiimdelgen qarjylandyrý baǵdarlamalaryn ázirleý jáne Shymkenttiń aýyl sharýashylyǵy áleýetin damytýǵa qosymsha qoldaý kórsetý usynyldy.
Depýtattar bul sharalar aýyl sharýashylyǵy óndirisin damytýǵa, investitsiia tartýǵa jáne halyqty azyq-túlikpen qamtamasyz etýge oń áser etetinin atap ótti.
