دەپۋتات داۋلەت مۇقايەۆ تۇساۋ كەسىپ جۇرگەنىن سىناعاندارعا جاۋاپ بەردى، دەپ حابارلايدى Dalanews.kz.

مۇقايەۆ وسى ۋاقىتقا دەيىن 3600 بالانىڭ تۇساۋىن كەسكەنىن ايتتى. 

"ونىڭ ءبارىن تەگىن جاسادىم. ەشقانداي "ستاۆكا" جوق. باسقا تانىمال ادامدار سياقتى 500 دوللار، 1000 دوللار الىپ جۇرگەن جوقپىن. ءبارى تەگىن. العاش 2016 جىلى تۇساۋ كەستىم. سودان بەرى الەۋمەتتىك جەلىدە كورگەن ادامدار، ارنايى ماسكەۋدەن، اتىراۋ، اقتاۋدان كەلگەندەر بولدى. ارينە نەشە ءتۇرلى پىكىر دە، نەگاتيۆ تە جازىپ جاتادى"، دەيدى دەپۋتات. 

ونىڭ سوزىنشە، دەپۋتات 36 جاستاعى ايەلدىڭ تۇساۋىن كەسكەن كەز دە بولعان. 

"36-38 جاستاعى ايەلدىڭ تۇساۋىن كەستىم. ول كىسى "مەن سۇرىنشەكپىن، تۇساۋىم الا جىپپەن كەسىلمەگەن، ىرىمىن جاساپ بەرىڭىزشى" دەدى. مەن كىشكەنتاي بالانىڭ تۇساۋىن عانا كەسەتىنىمدى ايتامىن. بۇل جولى جولىن جايىپ قويعاننان كەيىن باس تارتا المادىم"، دەيدى داۋلەت مۇقايەۆ. 

ول تانىمال بولعانعا دەيىن تەك جاقىندارىنىڭ تۇساۋىن كەسكەنىن ايتادى. 

"وندا تۇرعان ەشتەڭە جوق دەپ ويلايمىن. ابەستىك دەپ ويلامايمىن. ول قازاقتىڭ ءداستۇرى. ەكىنشىدەن، ءبىزدىڭ داستۇرگە ءسىڭىپ جاتقان وزگە ۇلت ازاماتتارى دا بار. وسى ۋاقىتقا دەيىن ورىستىڭ دا، كارىستىڭ دە تۇساۋىن كەستىم. ونىڭ ءبارى جۇمىس ۋاقىتىنان تىس جاسالىپ جاتقان ارەكەت"، دەپ ءتۇسىندىردى دەپۋتات.