قازاقستاندا زەينەت جاسىنا جەتسە دە، مەملەكەتتىك قىزمەتتە جۇمىسىن توقتاتپاعان ازاماتتار سانى 800-دەن استى. بۇل تۋرالى ءماجىلىس دەپۋتاتى بولاتبەك الييەۆ Facebook پاراقشاسىندا جازدى. ول بۇل جاعدايدى رەسمي دەرەكتەرگە سۇيەنە وتىرىپ سيپاتتاپ، مۇنداي تاجىريبەگە سىن ايتتى، دەپ حابارلايدى Dalanews.kz.

دەپۋتاتتىڭ ايتۋىنشا، بۇل ازاماتتار مينيسترلىكتەردە، اكىمدىكتەردە، كوميتەتتەر مەن دەپارتامەنتتەردە قىزمەت اتقارىپ وتىر. ولاردىڭ بارلىعى زەينەت جاسىنا قاراماستان، جۇمىسىن «ءوزارا كەلىسىم» نەگىزىندە جالعاستىرۋدا. اڭگىمە، نەگىزىنەن، اكىمشىلىك مەملەكەتتىك لاۋازىم يەلەرى تۋرالى بولىپ وتىر. مۇنداي كەلىسىمشارتتار جىل سايىن جاپپاي ۇزارتىلۋدا.

— قۇجات جۇزىندە بۇل تاجىريبە تاجىريبەگە قۇرمەت كورسەتۋ رەتىندە كورىنۋى مۇمكىن. ءبىراق كوپ جاعدايدا مۇنداي شەشىمدەر ەرەكشە قۇزىرەتتىلىكپەن نەمەسە كادر تاپشىلىعىمەن ەمەس، ءبىرىنشى باسشىنىڭ جەكە شەشىمىمەن، كەيدە سىرتتان كەلگەن وتىنىشتەر مەن تاپسىرمالارمەن بايلانىستى، — دەدى الييەۆ.

ول كەيبىر قىزمەتكەرلەردىڭ «ەرەكشە مامان» رەتىندەگى نەگىزسىز سيپاتتامامەن قىزمەتتە قالىپ جاتقانىن سىنعا الدى.

كەيبىر مينيسترلىكتەر مەن وبلىستاردا كورسەتكىش جوعارى

زەينەت جاسىنداعى قىزمەتكەرلەر ەڭ كوپ جۇمىس ىستەيتىن مينيسترلىكتەر مەن وڭىرلەر دە اتالدى:

• قارجى مينيسترلىگى – 89 ادام

• دەنساۋلىق ساقتاۋ مينيسترلىگى – 73

• اۋىل شارۋاشىلىعى مينيسترلىگى – 43

• اقمولا وبلىسى – 53

• پاۆلودار وبلىسى – 37

• قاراعاندى وبلىسى – 34

• قوستاناي وبلىسى – 32

• اباي وبلىسى – 35

— نەگە ءدال وسى وڭىرلەردە جانە قۇرىلىمداردا زەينەتكەرلەرگە جۇكتەمە ەڭ جوعارى؟ بۇل جاي عانا سايكەستىك پە، الدە ەشكىم جاۋاپكەرشىلىك العىسى كەلمەيتىن باسقارۋشىلىق شەشىم بە؟ — دەپ سۇراق قويدى دەپۋتات.

كۆازيمەملەكەتتىك سەكتورداعى كۇردەلى جاعداي

بولاتبەك الييەۆ كۆازيمەملەكەتتىك سەكتوردا جاعداي ودان دا كۇردەلى ەكەنىن اتاپ ءوتتى. مۇندا جاسى مەن قىزمەت وتىلىنە قاتىستى شەكتەۋلەر جوق. ۇلتتىق كومپانيالاردا، كمك، رمك، حولدينگتەر مەن قورلاردا زەينەتكەرلەر لاۋازىمدا مەرزىمسىز وتىرا الادى.

— بۇل جۇيەدە ون جىلداپ ءبىر ورىندا وتىراتىن قىزمەتكەرلەر بار. ولار باسشىلىققا «ىڭعايلى» ادامدار بولعانى ءۇشىن عانا ورنىن ساقتاپ وتىر. بۇل — اينالمالى، جابىق كادر جۇيەسىنىڭ قالىپتاسۋىنا جول اشۋدا، — دەدى دەپۋتات.

ول سونداي-اق مەملەكەتتىك قۇرىلىمداردا سيفرلاندىرۋ، رەفورما، كادرلىق رەزەرۆ جايلى ءجيى ايتىلاتىنىن، الايدا شىن مانىندە جاڭاشىلدىقتى مەڭگەرە الماي وتىرعان قىزمەتكەرلەردىڭ ءالى دە باسىم ەكەنىن جەتكىزدى.

كادرلىق ادىلەتتىلىك پەن رەفورما قاجەتتىلىگى

دەپۋتات مەملەكەتتىك جۇيە ادىلەتتى بولۋى ءتيىس ەكەنىن العا تارتىپ، بىرەگەي قۇزىرەتى جوق، تەك «ىڭعايلى» قىزمەتكەرلەردىڭ ورنىن جاستارعا بوساتۋى قاجەت ەكەنىن ايتتى.

— قابىلەتتى جاستار جول تابا الماي، شەتەلگە كەتىپ جاتىر. سەبەبى ولار ءالسىز ەمەس — ولارعا جول اشىلماعان، — دەيدى الييەۆ.

ونىڭ ايتۋىنشا، بۇل ماسەلە كەزەڭ-كەزەڭىمەن دەپۋتات باسقاراتىن كوميتەتتىڭ باقىلاۋىنا الىنادى. ءاربىر مينيسترلىك پەن اكىمدىكتە زەينەت جاسىنداعى قىزمەتكەرلەردىڭ نە سەبەپتى كەلىسىمشارتپەن قالدىرىلعانى انىقتالماق. سونداي-اق دەپۋتات مەملەكەتتىك قىزمەت ىستەرى اگەنتتىگىمەن بىرلەسە وتىرىپ، ناقتى شەشىمدەر قابىلداۋ قاجەتتىگىن ايتتى.

— بۇل — ناقتى كادرلىق رەفورما. جالاڭ ۇران ەمەس. ەگەر جۇيە جاڭارماي قالسا — ىشتەن ءىري باستايدى. بۇعان جول بەرۋگە بولمايدى، — دەپ تۇيىندەدى بولاتبەك الييەۆ.